独家丨陈展鹏罕谈家事同单文柔多分歧拍《超能使者》搞到情绪崩溃吓亲老婆

2022-11-24 07:00

陈展鹏于TVB台庆剧《超能使者》中段有突破性演出，原来展鹏的幸福家庭只是假象，因为「老婆」刘佩玥唔满足生活现状出轨，导致家破人亡。戏外的展鹏拥有美满婚姻，还向《头条日报》大晒同今世及前世情人的「私密牀照」！不过，幸福家庭背后，一向唔多提私事的他自揭暗藏婚姻危机：「始终相见好同住难，单文柔(Phoebe)又细我10年，我哋有好多分歧。」采访：方骞平摄影：邓国良

老婆Phoebe及爱女小猪比黐实展鹏，难怪他一脸满足。

陈展鹏同时间有4套剧角逐视帝，好厉害。

剧中自我放弃嘅展鹏，仲要被拳打脚踢兼迫食「狗饭」，惨绝人寰。

上周《超能》剧情，陈展鹏被揭患有妄想症，于幻觉同真实记忆之间游走难度好高，因为要瞬间转换表情，展鹏获赞展现「视帝级」演技，被网民封为「视帝鹏」。自6年前凭《城寨英雄》首夺视帝后，展鹏今年再有机会问鼎视帝，他坦言恨再攞奖：「希望小朋友(小猪比)见到爸爸去工作有好成绩，如果攞到奖畀妈咪睇就好喇。」不过，他认为近10年，黄宗泽及袁伟豪拍咗好多好戏，两人都有机会。

展鹏坦言恨再拎视帝。

好难得有个咁有发挥嘅角色。

陈展鹏唔觉自己有亚视味。

他明白包容重要性，唔介意被批评。

展鹏嘅演出愈来愈有深度。

陈展鹏眼中黄宗泽及袁伟豪，于《法证先锋V》中表现出色，都有条件封帝。

陈妈妈凑孙为乐，展鹏希望加码，今年送个视帝畀妈妈。

6年前陈展鹏及胡定欣获视帝、视后。

半夜三更坐客厅发呆

今次陈展鹏尽全力拍《超》剧，自爆情绪一度崩溃，令老婆担忧：「拍戏咁耐(26年)未试过连稿都唔对就离开录影厂，喺厂外唞咗个几钟先回归，有啲逃学feel，因为当时真系好辛苦，好似有密室恐惧症咁，嗰种恐慌性去到边缘状态，精神情绪好得人惊。作为男人好难接受仆心仆命为照顾家人，将自己放到最低，无奈现实社会就系压迫咁大，有边个年青人做到自己想做嘅嘢呀？呢个剧以喜剧手法包装，实际系反映社会现状，基层人士最想有超能力。」

拍呢场失常戏，展鹏要游走喺幻觉同真实记忆之间，好有难度。

戏里展鹏仆心仆命照顾老婆，但刘佩玥唔满足生活现状出轨。

拍失常戏精神压力好大。

陈展鹏多得监制文伟鸿，给他演绎有攞奖潜质嘅角色。

由于用喜剧包装，林子善、陈展鹏及陈山聪都有搞笑情节。

《超》剧仲有吊「威吔」场口，陈展鹏下身激凸。

因为拍剧压力大，展鹏难免会将情绪带返屋企：「返到屋企我仲想静吓，唔畀人掂得，Phoebe知道我要沉淀，但未必能理解，明明早上好开心咁出门口开工，但夜晚变到面青口唇白，半夜三更开盏暗灯独坐客厅，哈！佢惊我睇唔开啩！」

Phoebe放弃千金小姐身份，做个称职妈咪。

展鹏好重视家庭生活，返内地拍戏都带埋老婆喺身边。

努力学做老公要包容

结婚4年多，陈展鹏自揭同老婆经常有拗撬，他仍努力学习做人夫：「梗系会有嗌霎㗎啦，点会冇呀？始终老人家话『相见好同住难』，主要系性格唔夹，尤其Phoebe获家人万千宠爱在一身，而我10几岁就出嚟做嘢，两人年纪又相差10年，两个世界嘅人会有好多分歧。𠵱家佢去到一个新家庭，要放低身段配合小朋友、有夫家，要安排好多嘢，生活上要配合埋我工作。」而每次争拗，展鹏坦言都系婚姻危机，他好认真解说：「就算系意见不合、黑面都系婚姻危机，你试吓每日都有普通嗌霎会点呀？其实好大件事，加加埋埋会影响到大家情绪，其实唔好讲系夫妻，人与人之间情绪唔好，一秒间可以杀人，但维系感情可能要一年，甚至更长时间。」

两夫妻要包容和忍让。

要安排家庭日增进感情。

千万唔好用个女嚟维系夫妻关系。

只要彼此了解就有力量行得更远。

陈展鹏讲到夫妻相处之道，首要著手了解对方性格，要包容和忍让：「有时都会强迫自己深呼吸，畀佢闹两句，买杯咖啡搞掂，因为都知道系锡你嘅人，唔通老细畀面色你睇，你会闹佢咩！只要明白到个根喺边度，就会够力量去得更远，但我唔锺意啲嘢成日重覆发生，重蹈覆辙即系未解决，累积落嚟就会出现好多问题，夫妻间有问题，个女变成维系动力最唔好。」至于婚姻之道，展鹏表示最简单就系幸福，最幸福系因为满足。