世界杯2022｜专栏：加拿大出綫未绝望

话咁快，首轮分组赛踢完！刚周三上咗去《赛马日在线》做嘉宾主持，一边望住赛马，一边睇住德国对日本嗰场精采赛事，真系睇到我同黄总拍手叫好！

德国今场嘅死症同阿根廷输畀沙特一样，都是有把握力同后防轻敌问题，呢个系今场输波嘅重大关键，前綫入球能力飘忽，似乎喺费历克上任之后无好明显嘅改善。嚟紧对年轻力壮兼状态大勇嘅西班牙，随时畀一只又一只「狂牛」撞散，唔通上届分组赛出局嘅历史会重演？

正如艾尔之前所讲，三笘薰系日本嘅X factor，后备入替即刻令左路有晒活力。不过，要真正发挥X factor嘅威力，临场调动嘅时机非常关键。领队森保一今次做得极之好！先喺半场换入冨安健洋稳住防守，再趁德国球员体能下降，不断换入前綫有速度嘅球员，等待机会打反击，为日本攞得相当重要嘅胜仗。唔通畀人闹得多，先至会成才？希望「一哥」可以保持水准，「东洋武士」系可以走得更远㗎！

另一场分组赛加拿大对比利时，亦令艾尔印象非常深刻。事隔四十几年再杀入世界杯决赛周嘅加拿大，对住上届季军比利时，唔单止无退缩，上半场不断嘅高位逼抢，令到对手后防风声鹤唳。最后仍然输波，皆因前綫把握力唔好，球队处理死球嘅部署一般，约拿芬大衞同艾方素戴维斯嘅状态一般，进攻上贡献唔多。难怪奇云迪布尼赛后都话，加拿大球员呢场更加值得表扬。

加拿大今场畀全世界睇到，佢哋都可以踢到咁有侵略性嘅足球。之后只要保持今日嘅进攻模式，把握力好番啲，对住克罗地亚同摩洛哥，艾尔觉得仍有出綫希望。 艾尔                                              
立即下载 | 全新《星岛头条》APP : https://bit.ly/3yLrgYZ