世界杯2022｜专栏：摩洛哥半场和谂得过

艾尔曾经讲过，加拿大第一场对比利时真系打得唔错，仍然有争出綫机会。嗰场比利时同样打三中坚阵式，但维顿汉、艾达韦列特同丹当斯卡嘅组合，早段被对手不断压逼，好多时候都交唔到波，制造唔少险象。幸好有泰拔高图尔斯屡次化险为夷，先可以仅胜加拿大。

比利时第一场踢得麻麻哋，除咗后防面对高压逼抢踢得辛苦，中前场球员嘅表现亦比预期差，尤其系奇云迪布尼，上半场有两次「人多打人少」嘅情况下，都将个波分去唔系太合适嘅路綫，似乎未在状态。前锋巴舒亚伊就一如预期咁令人失望，成场比赛只有射入嘅一球较好，其他时间近乎做咗「隐形战机」。作为车迷嘅艾尔，都知呢位球员靠唔住，只系卢卡古继续受伤，阵中又无其他中锋，佢惟有顶住先。艾尔觉得比利时阵中有唔少年轻嘅球员可以出下场，特别留意今季转投李斯特城嘅菲斯，佢嘅用波能力同传波准绳度，相信会为比利时带嚟唔少帮助。

北非球队摩洛哥上场闷和克罗地亚，即使控球比率比较低，但八次埋门多过对手，证明球队嘅反击都有一定威胁，只系比握力比较一般。摩洛哥阵中系有唔少有质素嘅球员，当中艾尔比较欣赏踢紧巴黎圣日耳门嘅阿舒拉夫，佢喺右路嘅进攻角色非常重要。摩洛哥上场踢得唔错，但要留意佢哋嘅正选同后备阵容实力有一定差距，如果半场仍然久攻不下，对住比利时便有一定危机。

今届非洲球队有个特性，就系上半场防守上几有纪律，令唔少球队几难破到密集。以比利时上场嘅表现睇，今场对住摩洛哥未必可以咁快入到波，半场和有得谂。艾尔

立即下载 | 全新《星岛头条》APP : https://bit.ly/3yLrgYZ