独家丨黄宗泽最惊女友黐身：小鸟依人真系唔得 入行23年唔强求拎视帝只想攞影帝
2022-12-02 07:00 
黄宗泽（Bosco）首度加入「法证」系列，主演台庆剧《法证先锋V》，他好锺意剧中的古怪法证人员角色，令观众好有新鲜感，不过讲到争视帝就完全唔期待，唯独对攞影帝流晒口水。本月13日便42岁，曾被航拍机击中受轻伤的他承认年纪唔轻，现在拍动作戏会更「锡身」。旧爱胡杏儿已经是三子之母，单亲家庭长大的Bosco直言冇成家立室概念，更怕女友太黐身，宁愿约朋友去玩，所以完全唔心急搵另一半。采访：杜杜 摄影：朱伟彦 发型:Kelfung@HH Salon.nail 化妆:Cyrus Lee场地:Oystermine
Bosco首度参与《法证》系列，他承认最初有压力，怕毁了这个经典，但睇完剧本发觉好有新鲜感，因演的「余星柏」同以往的法证人员好唔同，胜在够古怪亦跟他性格有好大反差，「成日睇开嗰啲戴住黑超行去事发地点，跟住攞个箱出嚟做嘢，我呢个有时自己唔去，叫人去做𠻹呀！」讲到继2018年《飞虎之潜行极战》再跟王敏奕合作，Bosco竟搞笑话：「我觉得有『保护家嫂机制』，我哋完全冇亲热戏罗！哈哈！」他解释纯属讲笑，因两人剧中关系非一般，「首先系女追男，同埋一个咁怪嘅人，点会接受得到一个傻大姐咁嘅女警嚟追佢吖！」
攞唔到视帝认命
《法证V》作为台庆剧，得奖机会自然被睇高一线，不过入行23年的Bosco却对奖项睇得好淡，「我从来都冇谂奖，唔关我事啦！我哋做演员、艺人，就系提供娱乐、欢乐畀观众，观众觉得正喎，好睇已经够。」不过他一直都在海外颁奖礼夺奖，今年4月时便凭剧集《非凡三侠》在《纽约电影电视节》夺得「最佳男主角」优异奖，相反他跟TVB的视帝奖总是擦身而过，会否有遗憾？他表现轻松：「无缘，认命啦！哈哈！时也，命也，有奖攞当然开心，始终系个鼓励，但系咪好强求一个奖，真系冇，视唔视帝对我嚟讲又唔重要。」不过对于影帝，他却直认好恨攞，「影帝梗系啦！呢个系香港最崇高嘅金像奖，如果呢个都攞到，就真系冇嘢好讲！呢个真系恨，但系都好被动，一个演员要等一个机会，一个好剧本，令到你有机会入到围，都已经被动！」
周身伤患好锡身
出名拍戏搏命，因而经常受伤的Bosco，早前拍电影《无间一战》时，与拍档林子善被航拍机击中，幸有惊无险，但他重提这事仍犹有馀悸，「嗰场讲子善中咗枪，我跪喺地抱住佢，第一take冇事，但第二take听到啲怪声，我同子善都知濑嘢，望上去有盏顶灯加上夜晚睇唔到架机喺边，听声系撞紧落嚟，我咪即刻揽埋子善，两个人个头黐埋一齐，真系中我个头，好彩个机叶冇打中，只系打中手指。」经历多次受伤的他，自言年纪唔轻，所以近年已学识「锡身」，「以前拍动作戏，睇一次排一次就嚟，但𠵱家点都会要求试一次畀我睇先，唔系以前廿几岁，𠵱家伤咗复元时间要长啲，我上次只脚抖得12日就开工，我仲记得拍完去东京，死都要行好佢，行咗几日只脚又真系唔痛喎！点知隔两日飞返香港，执行李去机场，条颈有少少唔舒服，谂住系瞓捩颈，点知落机时只手痹痹哋再睇医生，原来颈椎有少少移位，整伤咗神经线，跟住又要抖半年，原来只脚伤咗影响，同埋有啲旧患积咗落嚟唔知。」
冇朋友敢一齐食饭
早前Bosco被拍到跟「翻版李施嬅」，到他经营的餐厅食晚饭而被指有新欢，他就解释开工食饭盒多，难得放假就会约朋友去玩兼食好嘢，「嗰个梗系唔系啦！唔好成日屈我啲friend啦！你哋成日屈到新识朋友都唔敢一齐食饭。」他更愈讲愈劳气，「嗰时四人限聚，净系cut我哋两个，对面有个男仔同埋TVB幕后人员又唔话佢，有冇搞错？！」虽然就快42岁，但他坦承对成家没概念，「阿妈觉得冇咁需要先啦！二来唔知系咪自己细个单亲，唔会好憧憬阿爸又拖住个女，阿妈拖住个仔凑够个好字，煮饭行公园去旅行，我真系完全冇呢个picture。（最多都系搵个伴？）都可以咁讲，真系觉得有就有冇就冇罗！」冇女陪的他，就算放假亦不愁寂寞，「约朋友出海，一系食饭，一系买餸煮饭，不知几爽，我又唔锺意人黐身。」他承认拣女友首要够独立，「我咁多嘢做，又成日周围飞开工，唔独立就死得，小鸟依人唔得啦！我cannot，千祈唔好，呢个系先决条件，其他嘢再讲。」
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应