头条戏场丨《五腥级盛宴》大巴大巴掴死你班虚伪怪

一部讽刺食评家、锺意食装修嘅作状友、愈难Book愈想Book的虚伪L及打卡KOL的黑色惊栗喜剧。无论是「追星」老饕、快餐爱好者、大排档常客定觉得高级餐厅得个贵字的酸民都啱睇，而且仲会睇得好有快感，耻笑位相当到肉，两小时不断笑出声，娱乐性非常丰富，套戏讲到咁白会唔会得罪好多人㗎？（上映中）撰文：廖思慧
 

Tyler临时邀请Margot去隐世餐厅，后者听到每位$1,250美元即刻爆粗。

Ralph Fiennes演嘅厨神好有气势，一拍手我就惊惊。

Margot对厨神的食物觉得不外如是，激起厨神的好奇心。

享誉国际的星级厨神Julian Slowik（Ralph Fiennes饰)在西北太平洋小岛上开设一间隐世餐厅Hawthorn，叫得隐世都知价钱唔会平，冇错，Tasting Menu每位$1,250美元（约9,700港币），咪以为畀得起钱就有得食，Sorry，每晚限定12名宾客，有钱有面都未必排到你，愈难Book愈多人争住Book，一位难求，话畀人听Book到已经好似赢咗全世界。

小岛上所有种嘅嘢都食得。

每枱有一个唔见得光的故事

厨神头号靓仔粉丝Tyler（Nicholas Hoult饰）及寸嘴女伴Margot（Anya Taylor-Joy饰）、著名食评家及编辑、过气电影红星及助手、超富贵老夫妇常客，及年青才俊有幸成为座上客。电影节奏好紧凑，一开场众宾客登上接驳船到小岛开始已经好紧张，侍应从环境及食材开始介绍，每日在海边捉到乜就食乜，就算伴碟的石头及花都取之岛上，然后七道料理都有一个好有意思的名称，如七宗罪，跟身有屎的宾客真系好匹配。

餐厅真系好隐世，有咩事死路一条。

食评家同编辑，前者经常用一堆作状嘅字去形容食物，个人喜好掌握餐厅的生杀大权。

众厨师被厨神洗晒脑，连条命都可以唔要。

周洪饰演厨神得力助手，讲每句说话都令人不寒而栗。

富贵夫妇系Hawthorn常客，帮衬过十几次，但完全唔记得之前食过乜，抵闹。

Margot一早发现厨神唔妥，所以见到任何精致食物都唔愿食。

去到中后段，剧情急转直下，进入惊悚片模式，有血，吓人，但同样好多笑位，节奏更快，厨神由优雅地挖苦到开到口力斥得个壳的美食文化，特别怒轰操生杀大权的美食评论家及连自己食过乜都唔知，只挂住晒命打卡的KOL。故事荒诞又有创意，视觉呈现有美感，对白简而精又好笑，如果厨神背景可以讲多啲就更好，留意厨神阿妈，全片最黐线角色。

电影去到中后段剧情急转直下，食完好嘢再同你玩月黑风高杀人夜。

冇错，有个食客想打烂玻璃逃走，好欣赏佢肯去打烂呢个行为，起码试过。

Anya Taylor-Joy戏中超靓，fans入场睇佢都值回票价。

睇Nicholas Hoult个惨样都估到厨神同佢一定讲衰嘢，不过佢都唔系好人，唔抵可怜。

 

制作人特别请来米芝莲三星大厨亲自主理电影中出现的每一道仿如艺术品的精致菜式，还有Netflix大热美食节目《Chef’s Table》创作人担任顾问，并且参考了多家举世知名的星级餐厅包括Noma、French Laundry、El Bulli 和Fäviken，以一丝不苟的美术、摄影、场景和服饰设计，呈现一个真实感十足的Fine Dining美食世界。

 

石同花都取之岛上，咁大盘嘢只系食石上面嗰件带子。

好作状嘅份子料理，好哋哋一件肉唔得嘅，系都打到变成泡。

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ