独家丨陈柏宇呻符晓薇喺屋企都话冇带信用咭 爆笑讲家事指老婆系世纪骗案
2022-12-22 07:00 
陈柏宇（Jason）将于明年2月feat.「九龙摇摆俱乐部」举行演唱会，所以今年圣诞同新年都未能尽兴咁玩，不过怀孕5个多月太太符晓薇（Leanne）就踢爆，其实老公完全没节日感，唔锺意惊喜亦零浪漫。Jason反而投诉老婆婚前婚后两个样是世纪骗案，更追问老婆点解喺屋企都话冇带信用咭，两人爆笑讲家事。另外，Leanne 更公开怀第二胎情况。采访：杜杜 形象:Kay Pang 发型:Aki@The Atti 化妆:Jessica Chan 服装:mm6 Masion Margiela @ithk 场地:The Goodies Hub
Jason 今次演唱会有别于以往的演唱会模式，首次连同超过40人大乐团及乐队共同演出，「今次个骚音乐性质系会强啲，想以唔同方法去做骚，我系好享受同人哋一齐合作嘅感觉，今次所有歌曲偏向管弦乐嘅方向去出发，但唔系请队管弦队嚟嘅感觉，因为想pop多啲，采用音乐嘅原素，搵唔同类型风格嘅乐手返嚟演奏，可以有啲唔同火花出现。」
由于演唱会在2月4日举行，Jason预了普天同庆的圣诞等节日都要养声，「心态上冇得玩，新年玩得太尽庆声又唔好，我都谂紧做之前，睇吓妈妈（跟囡囡称呼太太）同Abigail点样可以配合到我，有机会都想佢哋去staycation，去返几日等我可以有多啲时间喺屋企休养同埋集中多啲，Abigail喺度我又唔忍心佢嗌我唔应佢。」原来之前Jason开骚，已经测试过囡囡会有这情况，「如果我唔讲嘢，佢会叫我『讲嘢啦爸爸你讲嘢啦』，我做口型，跟住佢扮我做口型，佢配合唔到，佢未明呀！」
送礼物唔锺意有惊喜
不过 Leanne早已习惯一个冇节日感的老公，因拍拖时Jason连圣诞礼物已讲明唔锺意有惊喜，「我第一年送完嘢畀佢，佢同我讲『其实我哋唔使做呢啲嘢，如果我要乜嘢或者你想要乜嘢直接讲，唔使买到啲唔锺意嘅嘢』，佢系好唔锺意有surprise，好唔浪漫。」讲到买礼物，Jason突然呻，「好搵笨，我𠵱家唔讲圣诞节我要啲咩礼物嘅原因，系无论我讲咩，啲钱都系喺个pool攞出嚟。」Leanne狂笑，Jason继续爆料，「妈妈好好笑，佢有一个坚持系点都会碌我畀佢嗰张咭，但系我谂其实你碌边张咭，你啲钱都系喺同一个source度嚟。」Leanne解释分别是她的钱还是Jason的钱，但Jason忍唔住再话，「但好笑嗰次你话『嗰度唔收AE，爸爸你畀你张VISA我』，你冇VISA咩，冇带？屋企嚟㗎喎，屋企都可以冇带？！哈哈！」
Leanne见Jason爆家事爆得咁开心，索性玩埋自爆，「我开头拍拖唔系咁，一结完婚佢话系骗案嚟，嗰时好多嘢都系我畀钱，譬如去旅行嗰啲我多数会畀钱，我嗰时有做嘢，我嗰时好锺意返工嘛，哈哈！」Jason笑指Leanne婚前婚后两个样，「佢话好锺意返工，结咗婚生咗小朋友都希望可以继续返工，但系佢结婚后有日同我讲『我唔想返工』，真系世纪骗案，呢个唔系要求嚟，系知会同通知。」
搵堪舆学家帮BB改名
虽然送礼物方面，Jason对囡囡Abigail总算例外，但他跟Leanne承认现在小朋友经常有礼物收，「以前啲小朋友去人哋生日party，系生日嗰个收礼物，𠵱家嗰啲生日party，系个个小朋友都要有礼物。」所以生细女时，两人都不打算跟潮流代细妹送礼物给姐姐，令姐姐不会呷醋。Jason解释：「成日睇啱嘢就买畀佢，佢长期收紧礼物，同埋你送份礼物畀佢，佢唔会记住呢份礼物，以后都唔呷醋㗎嘛！」
Leanne今胎同样佗B女，但比上胎辛苦，开头呕足3个月，加上上次经验肥人唔肥胎，所以冇再丧食，体重亦未有增加太多，「今次重咗廿几磅，可能未怀孕前好瘦，减肥唔够100磅，反而今次个BB系大只过Abigail，医生话只脚长，我就即系谂『咁咪唔系佢（Jason）嘅』，佢即刻话佢对脚长。」Jason解释自己身材优点，「系黄金比例。」之后Jason再发表伟论，「我唔明keep超声波嘅相嘅必要罗！其实你上网个个超声波嘅相都系一样。」至于为BB改名，两人亦已计划好搵堪舆学家帮手，Leanne说：「始终我哋中文字穷，又要拼埋好听。」Jason就补充，「何乐而不为，你又可以配合埋个时辰八字，宁可信其有，又唔会有坏嘅。」
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应