头条戏场丨《上流落水狗》年度大癫之作

荣获本届康城影展最高荣誉金棕榈奖的《上流落水狗》，绝对是年度黐线片，有钱佬呀、Fashion界钜子呀，应该睇到好老尴，导演非仇富，其实耻笑你同我，即普通人都绝不留手。总能在日常生活中揭开人性荒谬，夭心夭肺令人失笑，有讽剌大师之称的导演鲁宾奥士伦(Ruben Östlund)又一讽刺钜作，戏中三部曲Part Part计算准确，片长近两个半小时，有大笑有耻笑又有苦笑，引人笑唔容易，分层次仲要有意思，娱乐性超丰富，黐鬼线导演。(上映中)撰文:廖思慧

Yaya同Carl闹交后好快和好如初，更以KOL身份获邀上邮轮叹世界。

做得KOL梗系乜都拍片影相放上网。

电影以不知名男模Carl(Harris Dickinson饰) casting作开首，现场毒舌记者一开口已焫著所有顶级名牌话事人及同性恋者，又指男模人工只有女模的三分一，之后轮到男模Carl同Model女友Yaya(Charlbi Dean饰)撑枱脚，男方埋单后爆Seed，「点解你搵得多过我，但次次都系我埋单？」两人为此由餐厅闹到上的士再嘈到返酒店，探讨男女平等有排讲，学大刘评吕小姐话斋，「真系讲七七四十九日都讲唔完」。

电影第一幕已经好抢口，只要品牌够高级，就可以抬高头摆架子鄙视消费者。

导演踢爆时装界秘密，男Model人工只有女模的三分一​。 ​

Carl为咗埋单一事闹女友闹到唔识停，佢话唔系钱嘅问题系原则问题喎。

 

入场前请勿食太饱
之后轮到本人最爱的邮轮篇，口不择言俄国肥料大亨、睇落友善的英国军火商夫妇及刚卖晒公司超有钱的秃头寂寞富商等出场，个个不食人间烟火，羡慕人哋有工返，喺酒吧同Yaya讲多两句觉得被重视，想派钱畀人咁滞。然后一场由失控船长（Woody Harrelson饰）主持的船长晚宴，加埋超强暴风雨，富豪出晒事，屎尿呕吐物横飞，船上化粪池也因船身摇晃而出现屎坑倒灌，配上重金属音乐，迎来估唔到的权势转换灾难。

梳短金发的就系高级侍应Paula，好能干，眼中只有钱，教下属只要乜都Say Yes就有源源不尽的贴士。

肥料大亨系咁帮情妇影相。

麻烦情侣获安排住靓房。

Carl上船后的工作就系负责帮女友影相。

Charlbi Dean去年8月因急病离世，呢套系佢嘅处女作亦系遗作，好可惜。 ​

肥料大亨带埋老婆同情妇上船，两个女人表面冇唔妥对方，有钱就可以和平共处。

暴风雨晚宴，肥料大亨同船长制造咗一场极尴尬又好笑的场口。

佢就系船长，冇责任心又唔正常，忽嘅。

肥料大亨老婆叫侍应陪佢游水，仲话咩人生唔可以剩系得工作，个个都可以讲，系佢唔得罗。

大亨老婆叫厨师放低啲食物陪游水，搞到啲嘢食变咗质加埋晕船浪，大亨老婆又疴又呕真系抵死。

呢对就系友善的英国军火商夫妇，呢幕死期到，笑死我。

 

最后，因为暴风雨加上海盗偷袭令邮轮沉没，生还者包括Model情侣、肥料大亨、秃头富商、乜都Say Yes的高级侍应Paula及菲籍洗厕所女工Abigail（Dolly De Leon饰)等冲到去荒岛，有钱人俾人服侍惯完全等死Mode，识捉鱼同生火嘅地位十级跳。导演在最后一Part 直击要害，非常直白又狠狠地对所有人作出批判，简单嚟讲，即系「在座咁多位都系垃圾」。

因为暴风雨加上海盗突袭，2亿5千万美金嘅邮轮沉没，生还者流落荒岛。

邮轮生还者，全部无求生能力，一个字:废。

麻烦情侣都系生还者，牛高马大乜都唔识做。

Abigail收埋好多喺荒岛好值钱嘅水同饼乾。

见救生船有水，生还者狂饮。

有钱佬就算手戴50万名表都冇用换唔到嘢食，想食自己去捉动物。

麻烦情侣去到荒岛关系突变，前后呼应返首幕两人闹交。

认住中间嗰位Abigail，洗厕所女工，识做人亦好识玩生存游戏，终极大佬。

 

《星岛头条》APP经已推出最新版本，请立即更新，浏览更精彩内容：http://www.stheadline.com/