杨明出狱｜ 受访谈及家人女友两度落泪 杨明亲述狱中生活 否认因自身安全转仓
2023-01-07 17:54 
杨明前年8月在半山马己仙峡道驾驶失事撞壆，官司扰攘逾两年，于去年12月底冬至当日遭法官驳回上诉，即时入狱18日兼停牌两年。杨明今日刑满出狱。经过两段公开道歉悔过访问之后，杨明再度接受《娱乐新闻台》访问，片段中杨明更数度落泪，亦有分享自己的狱中生活和解答因为自身安全而转仓的疑题。
【相关阅读】：
点击睇杨明今日的出狱及回TVB公司受访的过程：
杨明一开始接受访问时已经眼湿湿表示：「系呀，呢件事我都经历咗好耐，啱啱经历埋18日，其实我喺入面谂咗好多嘢，因为好多时间畀我自己静下来反省。我觉得我应该要成长，同埋我有好多嘢都做得不足，咁希望出返嚟嘅时间，可以做返一啲弥补嘅嘢，同埋一啲帮助人嘅嘢。（会唔会觉得呢18日对你嚟讲系好重要嘅一段时间？）其实喺入面头嗰几日系谂唔到嘢住，因为系一个好陌生嘅地方，同埋只系一个好狭窄嘅空间，咁一路都喺度恐惧呀，自责呀，其他嘢都喺个脑海入面浮现。之后过咗几日就开始定返落嚟，开始可以自己谂返多啲，思考多啲嘢。同埋我喺入面都睇咗好多书，可以帮助我喺人生入面点样行返条正路，点样可以返个有用嘅人。」
「其实呢18日入面，对我人生系一个好重要嘅时间，同埋转捩点，一定有啲得著，同埋成长咗好多。（其实你最自责嘅系咩嘢？）我最自责嘅系，我而家咁大个人，都做一啲事出嚟，令到一啲关心我嘅人、屋企人去极度担心。我最惭愧嘅系我嗲哋妈咪，令到佢哋两个老人家咁老都要担心我，呢个系我喺入面自责得自己最辛苦嘅一样。」
「（呢啲嘢令到你都喊咗好多次？）系呀，入面因为好多自己不明朗嘅事情都会发生，因为系一个好陌生嘅经验，咁恐惧，每个锺都缠扰我。（系边一方面嘅恐惧？）入面系我未接触过嘅，每个程序我都未真实了解过，所以一分钟接落嚟嘅情况都唔知，所以一路都好恐惧。同埋出面嘅舆论我喺入面系唔知嘅，喺唔知嘅情况下一路无限放大，无限去攻击自己，对于呢几样嘢系觉得好恐惧。」
「（女朋友同家人将爱带畀你？）我喺入面系自己一个承受我嘅空虚寂寞同埋自责，但佢哋，尤其系思明啦，佢要面对一啲舆论、记者，面对晒应该我要处理嘅嘢，佢一直喺出面都好辛苦咁帮我处理。同埋我父母都要受一啲唔好嘅批评。佢哋要承受嘅，喺我嘅自责入面个份量系最重。我都想喺度多谢佢哋。」问到可有方法与他接触？杨明表示有探访，可以书信，他们知道杨明在入面会好惊，所以每次见面都一直支持及给予亲切嘅笑容，「但我见到佢哋系担心嘅，但佢哋极力表现叫我唔使担心。」及后杨明一度哽咽，不忍落泪要用纸巾抹眼。
问到未来工作方面，杨明表示自己在18日的窂中生活亦有反思：「出嚟之后嘅生活，都有好多担忧。其实好多谢公司，喺入到去嘅第二人，思明已经同我讲公司对我嘅关心，对我嘅支持同埋所有资源。所以我喺入面虽然好多嘢谂，好多唔同事情攻击自己，但都有一个好大嘅鼓励同鼓舞，所以都好衷心咁多谢公司。由我由细到大，做错咗咁多嘢，公司都对我不离不弃，多谢。」
提到狱中的生活，杨明透露谓：「开头两、三日，因为我喺隔离中，所以甚少接触到人，咁非常之唔习惯啦，又空虚又孤独咁。之后我同自己讲唔可以咁落去，要积极咁面对，要反省。因为时间好多，平时可能玩吓手机就过一日，但喺入面，一早就起身望住幅墙，所以有好多时间思考同反省，亦都屋企人入咗啲小说，人生哲学嘅书，同埋圣经，咁我喺入面就系靠佢哋过艰难嘅时候。睇书同圣经嘅时间好似快过咗，同埋吸收咗书本入面嘅哲理，谂嘢多咗。头几日真系瞓得唔好嘅，之后虽然都唔系瞓得超级舒服，但都舒服咗。」
「入面唔可以接触其他人，每日就系多谢入面啲职员，每日送餐畀我嘅时候都同我讲一啲鼓励嘅说话。（佢哋会讲啲咩？）大部份都系叫我加油，唔好灰心，好快就过喇，十几日啫！虽然好简短咁，因为佢哋都唔可以同我倾偈，但每一次都系好窝心。同埋经历咗呢段日子，知道同人沟通系好重要。如果一日24小时冇同人倾过偈，系好辛苦。我谂呢个时间系我人生入面最多机会同时间去沉淀自己，过去十几年都系不断工作，日接夜夜接日咁拍剧，同埋之前有啲自己嘅生意去处理，30至40岁都冇乜机会去沉淀自己所做嘅嘢。」
至于日前提到杨明因为自身安全的问题而由荔枝角转去赤柱监狱，他即时否认还露出笑容：「绝对唔系我要求，因为我喺入面系冇得要求，同埋大家唔使担心，我入到去荔枝角嘅头5日都系隔离中，因为我都系外来，为咗避免有病毒带入去，要喺医院隔离咗我先，绝对系唔存在呢个讲法。去到第七日点解我要转去高度设防嗰个赤柱监狱呢，系因为第七日开始荔枝角嗰度有多人确诊，要安全同埋腾返一啲医疗室出嚟，所以要转我去赤柱嗰边，系一个好正常嘅做法，因为唔会有其它人同我接触到，所以完全唔会存在人生安全嘅问题。入面完全唔惊嘅！」
最后杨明亦有谈及自己之后的人生路，他表示接来年会选择先唞唞陪家人，「因为我谂返，我喺呢十几年真系好少陪屋企人，虽然我每个礼拜都系返屋企食饭，但系真真正正陪佢哋，关心佢哋就冇乜机会。至于工作上面都系睇公司安排。而自己嘅生意亦都系会暂时停一停先，呢十几日我都冇乜点睇报纸， 我净系知道听日（8日）就通关，所有嘢都系要出到嚟再计划。」杨明亦要计划如何重新投入社会。
而杨明的家人原来近日确诊了肺炎，不过在杨明出狱时已经「阳过」，现时仍在竹篙湾隔离当中，不过仍有少少喉咙痛，要过两日才能去接他们及与他们食饭。
【相关文章】：
最新回应