胡慧冲对泰国贡献受肯定 跟任达华 米雪获颁旅游大使感动爆喊
2023-01-27 06:15 
2015年在泰国四面佛发生炸弹爆炸事件后一个月，米雪、任达华及「泰国通」胡慧冲(Roger)曾应邀到已重修嘅四面佛祈福，振兴当地旅游事业。事隔8年，最近影帝任达华与米雪再应邀到泰国，跟Roger一起获泰国政府旅游局颁发「泰国旅游大使」，其实Roger早于10年前已获嘉许「泰国旅游大使」，今次系第二次得到该荣誉。同时向3人发出The Thailand Elite Card精英卡，在5年内可以自由出入泰国，以肯定他们对泰国的贡献。
获嘉许嘅Roger喺台上激动爆喊：「因为泰旅局局长开始致词时话欠咗我哋3个，当年四面神爆炸事件，佢好想亲自答谢我哋，但各种因素下加埋疫情未能做到，𠵱家喺适当时候应该做返啲嘢，听到我好感动，喺台上真情流露喊到好丑样，相反华哥及雪姐加插嘅泰文致谢词好得体。」
四日三夜嘅Friends of Thailand之旅中，「任雪冲」组合除了齐齐去拜四面佛外，又去著名的金佛寺参见僧王祈福及去唐人街食地道嘢，之后应曼谷市政府安排到唐人街出席晚会，Roger唱出《冲游泰国》主题曲尾句「你要记住泰国冇问题」乘机唱好泰国。多天行程都有安排保镳，隔开追住影相嘅途人，Roger说：「最深感觉系华哥及雪姐好亲民，主动跟同fans影相及交谈，华哥又好照顾我，自问大家都唔同grade，我又唔够面皮厚做唔到摄石人，但华哥会叫埋我一齐合照，唔会掉低我；米雪仲会照顾同行嘅雪梨仔女，佢唔止系大美人仲系大好人。」
《星岛头条》APP经已推出最新版本，请立即更新，浏览更精彩内容：http://www.stheadline.com/
最新回应