独家丨程人富自认感性想搣甩搞笑做正剧 拍《废J》要剥衫用20日修靓线条

程人富在ViuTV剧《杀手废J》演杀手公司行动主任「洛老师」，日前播出的骚肌戏，他拍得好兴奋，由于这是他首次在电视上除衫，为免失礼就算只得20日预备都照操肌，虽然为角色付出好辛苦，不过正是他喜欢演戏多过做综艺的原因，自称好感性的他，未来希望挑战演正剧。采访：杜杜 服装：Lowrys Farm HK

程人富承认自己最强武器是搞笑，好多时用作保护自己免流露脆弱一面。

程人富摆甫士，都会唔多正经。

首次跟Mike导（刘诺衡）合作，程人富cast做杀手已估计相当好玩，不过讲到最好玩肯定是第2集骚肌一幕，「导演开拍前同我讲，有幕要除衫，有机会除净底裤，我听到就好兴奋啦！哈哈！」虽然他在「小薯茄」的节目都试过除衫，但现在心态已不同，「嗰时我仲未够成熟，仲系男仔思维，未去谂要大只，去到呢刻上电视，已经系个man嚟，唔可以再畀排骨人哋睇，虽然嗰时冇乜时间得20日，就即刻打畀我健身教练。」程人富坦承平时都有健身，但肌肉就欠奉，「我1星期1次，好似PE堂咁上咋，哈哈！教练话得返20日，唯有系乾身啲，等啲线条明显啲，睇落大只啲罗！」

程人富这幕除净条孖烟囱，虽然不算好大只，但隐约都见到4嚿腹肌。

去年拍完《废J》个几月撞正小薯茄6周年开骚，程人富keep住身材跟阿J爆肌演出。

爱演戏多过做综艺

相对参与综艺节目，程人富坦认更爱演戏做演员，「演戏可以畀你做到真实做唔到嘅嘢，就好似今次咁，或者角色做坏人就可以奉旨去做坏事，就算做主持或者综艺节目，好玩嗰啲都系有角色扮演，会似啲演戏，所以我系锺意有角色去做。」

身为杀手公司行动主任「洛老师」，带新入职的「废J」熟习环境。

程人富好享受做演员，可以尝试现实中无机会做的事。

一直只有演喜剧机会的程人富，更渴望可以搣甩搞笑形象做正剧，就好似前辈张家辉和张继聪一样，「佢哋要推好多嘢先至成就到，我就梗系唔会推，因为我再推就冇得捞，哈哈！」不过，他自爆早前曾有此机会，虽然最终拍不成，已对他好大鼓励，「真系有导演搵我拍一啲完全唔搞笑嘅角色，我几感动㗎！我都好奇佢点解会搵我，佢就话睇到我搞笑外表下，其实里面系个性情中人。」虽然他感情丰富睇戏又易喊，但他承认爱面子不敢展露脆弱一面，上戏剧堂老师都鼓励他要冲破自己，「我唔敢释放情感出嚟，但若然有机会演，我都够胆去尝试。」

程人富拍小薯茄的节目以搞笑为主，他都好想正经演戏。

程人富新年愿望是跟阿J、肥蚊和朱Mic组成的男团FINALLY，有更好发展。

新网站 www.stheadline.com 已推出