古天后日志｜港股难吸引长线资金入市 有波幅 冇升幅

3月10日，天晴乾燥，局部地区能见度较底，日间相当温暖。美股隔晩高开，不过有加密货币金融机构倒闭，市场担心拖累与其有往来嘅银行，引发金融危机，银行及保险股急跌，道指亦由升转跌。收市三大指数挫逾1%，道指跌543点；标指跟纳指分别跌73点及237点。标指之前升至4100阻力之前，喺4078已掉头，如今再跌至3900支持位附近，因为隔晚有加密货币金融机构出事，有机会波及其他金融机构，要小心提防，加上标指已跌至3900支持位附近，而道指更失守33000横行区底部，走势有机变得更差。而因为有加密货币银行出事，加密货币亦遭抛售，资金避险情绪大幅升温，一旦今晚非农数据表现强劲，令美债息及美汇指数进一步向上，美股就瓜多过菜。

睇返港股呢边，走势更为恶劣，港股自2月份开始出现调整，至3月初反弹，但周二出现穿头破脚嘅利淡走势后急转直下，加上美汇强劲，美股下跌，令港股跌势进一步加剧。港股一直存在资金不足问题，即使周二早段大市曾高见21000水平，但全日成交亦唔到1600亿元，可见根本入场资金唔积极，无资金配合下，加上21000水平反引嚟大量短炒沽盘食糊，当日午后大市已由升转跌，20日线跟50日线得而复失，升势昙花一现，可怜高追嘅资金又被锁死。

呢啲情况其实喺旧年一直出现，一买就锁死资金，已令到市场资金乾晒塘，而阿爷虽然喺1月及2月都积极放水，但大部份嘅债仔，只系拎咗条新债去冚旧债，即系银行放嘅水，又喺流返入银行，并未有流入股市或个经济体系内，反而银行嘅负债表就大幅增加，其实呢个缺水问题，就系令中港股市易跌难升嘅原因。

过往北水系一路买货一路坐上去，又或者愈跌愈沟货，坐到街货乾塘为止，但近呢两年，北水已改变作风，比炒鬼更爱短炒，炒作时间愈嚟愈短，今日买货明日沽，甚至系上午买货，下昼已调转枪头。咁嘅情况下，就算港股已跌至一个合理，甚至抵买嘅水平，亦吸引唔到资金肯买货坐定定，个个都系走得快，好世界，如此一来，港股亦只会有波幅，冇升幅。