独家丨胡定欣王浩信齐爆入行之谜黄宗泽中学反串演灰姑娘泄表演欲

2023-03-23 08:00

黄宗泽（Bosco）、胡定欣和王浩信在《廉政狙击》饰演儿时好友，Part 1讲完初恋旧史，画埋人生首位男女神，Part 2嚟到讲入行，究竟三位童年经历过乜令到大个想做艺人?Part 1好嘈，Part 2当然唔好俾佢停，继续嘈落去。采访：杜杜摄影：Stanley (黄宗泽)形象:Queenie Yu 服装:Wardrobe: Homme Plisse by Issey Miyake 发型:Kel Fung@HH salon.nail化妆:Davina from Cyrus Lee’s team(胡定欣)形象:Queenie Yu服装: Isabel Marant发型:Matt Chiu XENTER SALON 化妆:Stephen Lau(王浩信)服装:Harvey Nichols发型: Sue Cheung 化妆: Herny Li

浩信、定欣和Bosco讲起儿时生活点滴，表现得相当雀跃。

小时候最爱睇电视的定欣，看着每届《新秀歌唱大赛》的参赛者在台上演出，令她更加认清自己喜爱唱歌，「每年都会期待自己可以成为台上比赛嗰个人，有幸参加嗰届都系华星年代嘅新秀，仲要系旧IP（清水湾电视城）度搞，有幸去圆呢个梦。」

定欣唔想睇返新秀演出

既然是童年梦想，定欣自然每个细节都记得一清二楚，「我交咗表格两年，第1次冇入到8强，第2次先至入到，好记得嗰时得17岁未到18岁，要喺礼顿道1号排队面试，真系好深刻，因为入到8强喎！」定欣再回忆返1999年比赛当晚，「我唱李心洁嘅《成全我》，跟住又要考我跳住唱《问题天天都多》够唔够气，不过要入到最后两强先可以唱自己最拿手嗰首歌，我冇机会唱。」不过定欣笑言自己唔敢再睇返《新秀》，「嗰时有用录影机录低，但系有时经过时间洗礼，都唔系好想睇返，哈哈！」

定欣是父母掌上明珠，一直很支持她追梦。

定欣跟细佬一直感情要好。

定欣小学已爱上唱歌，经常梦想可以做歌手。

定欣长大后立志入行，首先参加新秀歌唱大赛。

定欣受新秀影响，自小已梦想成为参赛者，甚至入行做歌手。

浩信被家人阻止做童星

浩信怀疑小时候受《闪电传真机》影响，而渴望加入TVB，「嗰时放学得一个人喺屋企，做完功课就睇《闪电传真机》，有啲环节畀小朋友上去玩游戏，印象好深刻有个系冒险形式要过关，有个要成身黐满蜘蛛要揈甩晒，唔知点解细个觉得呢个游戏好好玩，咁就好想入TVB，对呢个机构情有独锺，哈哈！」 Bosco笑话：「入到TVB就为咗日日揈蜘蛛，哈哈！」定欣加把口，「咁都几奇特喎！」

到年纪再大点，浩信斋睇电视已经满足不到，「10几岁时我几有表演欲，就谂不如试吓参加童星艺员训练班，我填完份表格同屋企人讲，屋企人即刻搣烂张纸话『我唔要我个仔点点点』，嗰时我就打消咗，但原来呢样嘢紥根喺心入面。」Bosco继续搞事，「我知下次送咩生日礼物畀你，送啲蜘蛛同魔术贴，哈哈！」

除了儿童节目，其实浩信还受很多TVB电视节目影响，「细个睇《劲歌金曲颁奖典礼》，我冲紧凉舅父嗌我『学友攞奖快啲出嚟睇吓先』，我都会冲出嚟睇，真系好开心。嗰时有好多关于呢个台嘅回忆，睇电影都系喺度睇，好似发哥嘅《英雄本色》，会谂自己揸住支枪可以咁有型，加上自己都有几强表演欲，就不如畀自己试吓去做呢样嘢，好感恩圆一个梦，又想追下一个梦，一路都喺呢度发生紧。」

浩信（左）小时候最爱看《闪电传真机》，更想过做童星。

浩信梦想可以在电视台工作，2005加入娱乐圈终梦想成真。

入行初期的浩信，已经好识摆甫士。

22岁时长头发的浩信，跟现在分别很大。

睇电视成为浩信童年最佳娱乐，亦种下他做表演者的种子。

Bosco比赛迟大到被Miss掴

小时候不觉自己有表演欲的Bosco，竟然试过自编自导自演，「读中学有班际话剧比赛，仲要系英文嘅，我同几个同学负责写剧本同演埋。」定欣搞笑扮演英文话剧，「How are you ? I am good！哈哈！」浩信即跟队搭嘴，「Hi！Thanks！」最搞鬼Bosco读的是男校，却写个有女主角的故事，「我哋写咗个《Cinderella in China》，哈哈！」浩信追问：「 Cinderella（灰姑娘）系女仔，咁边个演？Bosco开心答：「我咪系Cinderella罗！哈哈！我反串，因为系喜剧嚟。」浩信笑问：「12点先返屋企嗰啲？」定欣神回：「唔系，佢系12点先出去，哈哈！」

Bosco这个话剧演出太好笑，最终成为全场冠军，但过程却绝不顺利，「比赛前一晚有流星雨睇，咩千年难得一见，我胆粗粗走咗去石澳睇，谂住天光就走，点知截唔到车要打电话返学校，最后同几个唔识嘅人坐一架的士去地铁站，即刻冲返学校，学校已经排咗我哋班喺最后一队出场，我赶到返去啱啱好，好记得英文Miss好恶，一返到去叫我唔好郁举起手，佢哋夹手夹脚帮我换衫，跟住Miss忍唔住一巴掴落嚟话，『死仔，Cinderella冇咗Cinderella点算呀』哈哈！」

虽然被打但Bosco跟中学老师仍有联络，仲有重提这次比赛，「早排成班阿Sir Miss去我餐厅食饭，讲起嗰时应该有录影到个表演，Miss拍晒枱话『个咩阿Sir洗鬼埋』。」Bosco当时觉得演戏好玩，但仍没想过做幕前，直到1998年被星探发掘拍了人生第一个「阳光柠檬茶」广告，「拍完开始有人搵我，问我有冇兴趣入佢哋公司，咁啱契妈就识得TVB嘅人，叫咗去见，毕咗业就捉咗我入公司。」