古天后日志｜留意美国银行风暴持续市况仍反覆

3月23日，大致多云，短暂时间有阳光，天气潮湿温暖。美国联储局一如预期加息0.25%，本来市场系收货，加上联储局喺最新嘅经济及货币政策「点阵图」中，预测今年内仅再加息0.25%，美股升得好地地之际，鲍爷忽然喺记者会放鹰，表示如有必要，会加息至比预期更高水平之馀，仲话减息唔喺联储局预期嘅基本情景之中，即系今年内都未必会减息，市场本来憧憬今年减息希望幻灭，美股急转直下，再加埋财长耶妈表示，唔打算保障全部存款，银行股急跌，道指喺一粒钟之内由高位回2.8%，三大指数终告倒跌收市，跌幅超过1%。

本来加息0.25%系市场所接受，谁知鲍爷喺记者会上无啦啦放鹰，而周二美股回升，系憧憬政府为所有存款包底，银行信心危机有望终结，市场信心改善，岂料耶妈一盘冰水照头淋，除咗承诺为银行提供更多流动性之外，系唔会担保所有存款。佢呢一番说话，又引来淡友空军沽爆中小型银行股，FRC跳水15%，又系摆明畀人夹硬做低个股价，引发市场信心危机。值得留意系，今次出现挤提嘅中小型银行，全部都系上咗市嘅，反而无上市嘅中小型银行未见出事，反映今次嘅挤提风暴，系因为股价暴跌再有传闻银行唔掂，即系股价插水令银行被挤提而出现流动性问题，而非银行本身有流动性问题。若然如此，噚日古天后提到非常时期，要用非常手段，只要暂停金融股沽空，淡友军空无得透过沽空银行股搵食，咁问题自然解决。不过基于政治考虑，而华尔街一向对美国政府有强劲影响力，边有政府中人够胆提出呢个非常建议。只要空军不断重施故技，向上市中小型银行埋手，呢个信心危机真系没完没了。

至于港股呢边，噚日跟随美股反弹，成功修复10日及100日线，下一个目标自然系20日同250日线，大约系19800-19900水平，不过噚日成交额连1100亿都无，港股缺乏资金流入嘅问题仍然存在。即使阿爷已降准放水，无奈未见资金流入中港股市，讲到底，内地喺过去一年，楼股皆跌，疫情封城亦令生意人损失惨重，基本上仲边有闲钱可投入股市，就连A股都自顾不下，北水参与港股亦只系小打小闹，短线炒卖，走得快，好世界。无资金肯作中长线投资，继续得一注钱塘水滚塘鱼，港股已进入有波幅，冇升幅嘅闷局之中。总之大市未能企稳250日线，重上20000水平，港股都系反覆，未能走出困局，反而要留意美国银行业风暴能否结束，若然三日唔埋两日，又有中小型银行爆镬，美股难捱，港股亦难有好日子过。