古天后日志｜银行风暴没完没了 市场信心脆弱

3月27日，多云，间中有雨，天气清凉。上周五又传出德银不稳，其股价一度跌15%，拖累美股早段下跌，其后德银获多方支持，加上徊银迅速宣布提前赎回15亿美元次级债券，向市场发放其财政仍然稳健讯息，股价跌幅总收窄至跌3%收市，美股亦扭转跌势，三大指数由跌转升。上星期本栏已提过，欧美银行风暴，系沽空淡友一手搞出嚟，啲银行系无事畀佢哋搞到有事。

无论系美国政府抑或欧洲政府，目前嘅取态都系救存户，唔救股东，总之存款就担保拎得到，但银行股东就肯定要负担损失，CS就连债权人利益亦被牺牲，无论SVB被拆骨出售，定系CS被UBS收购都好，空军透过沽空已获得巨额利润。只要政府取态不变，继续系救存户，唔救银行，未能阻止空军沽空下，佢哋都系重施故技。虽然德银迅速提早赎回债券显示其财力，但呢一招喺瑞CS爆煲前，CS都已用过一次，结果喺传言不断下，存款大量流失，CS最终因为信心问题，存款加快流走下，被逼至无路可退，而踏上被并购命运。

目前空军尚未被击退，最新攻击对象系德银，有消息指美国国会正讨论存款保障新法规，睇下呢招能否挽回市场信心。值得留意系正当中小型银行股跌到一仆一碌之际，美国嘅商业物业REITS急跌，原因系投资者担心一旦FRC破产，呢类债务较高嘅REITS将被逼出售资产减债，而疫情期间嘅WFH成为习惯，已令商厦物业空置率高企，商厦估值大减，一旦要被逼低价出售手上物业套现，呢类REITS将蒙受巨额损失。

除咗商业物业REITS濑晒嘢，持有大量债券嘅对冲基金，近日亦损手烂脚，因为所持债券被银行劲call 孖展，银行为自保唔会放水，一向依靠杠杆操作嘅对冲基金，当然难捱，一个唔觉意对冲基金连环爆煲，将进一步打击市场信心。目前市场信心脆弱，接连嘅爆煲令政府救亡成本愈嚟愈高，一日唔阻止空军嘅沽空行动，传闻没完没了，只怕欧美银行风暴会愈演愈烈。

至于港股呢边，都系嗰句，无水无得去，缺乏资金支持下，即使上周大市能重上二万大关，都不过系短线炒家落车套现嘅机会，只要大市再一次失守20及250日线，港股弱势持续，只会再一次向下探底，有波幅，冇升幅。