独家丨细细粒急瘦残爆响警号被王祖蓝捉入减肥营靠通穴位练饮水一周搣走20磅

2023-06-02 07:00

10年前体重高达260斤(286磅)的陈嘉佳（细细粒），近年转型做吃播KOL愈捞愈掂，每月平均做12次，每次直播都大饮大食，例如鲸吞5人份量日本菜，或食200串串烧，相当唔健康。近日她被网民发现面容憔悴现身浙江路边摊，幼脚跟圆润身形唔啱比例，健康状况令人担心。细细粒接受《星岛头条》独家访问，自爆老板王祖蓝好担心佢健康，上周胁逼她入住减肥营，一周已搣走近18斤(19.8磅)赘肉，最新体重182斤(200.6磅)。采访：方骞平

近日她被网民发现面容憔悴现身浙江路边摊，双脚同圆润身形唔成比例。

细细粒暴残样，健康状况惹人担心。

10年前圆碌碌体重高达260斤(286磅)。

每次做直播都大饮大食。

暴风式吸入海参面。

起身食果子煎饼做早餐。

试过一日食9餐。

食得好滋味。

高胆固醇大闸蟹。

食得好开心。

超巨甜品。

一口气食咗200条串烧。

细细粒为搵食，试过一日食足9餐，零食、饭餐、甜品样样齐，幸好身体冇大碍。她向《星岛头条》报平安指：「咁我仲后生，暂时未有『三高』同埋心血管疾病，但难保将来会有，所以食播以外尽量唔食嘢，做吓运动，加上工作太攰，其实近年体重自动回落到200斤(220.4磅)。」

细细粒话做吃播又唔系劲食，唔算伤身，所以唔会放弃。

零食都食埋。

细细粒最高峰时体重高达260斤(286磅)，有个巨型大肚腩。

3年前她曾秘密入院，但解释只系Body Check。

试过丧做运动减肥。

入营费需4万「人仔」

虽然体重回落，但两老板王祖蓝及彪哥仍然觉得唔够，所以上月出钱拉咗细细粒入减肥营：「老板好关心公司肥人嘅健康问题，佢Group埋13个肥人，上月21至28日齐齐入住佢哋朋友喺福州嘅一间别墅，营友中只有两个好似我咁身形，其他只有少少肉地，不过，胜在可以互动鼓励吓，饿及闷都可以坚持落去。每位营友要畀4万蚊人民币入营费，都算几贵，但由老板帮我支付。」

细细粒赞好老板王祖蓝好关心员工。

细细粒以做吃播大受内地网民欢迎。

头4日饿到发脾气

谈及入营体验，细细粒觉得辛苦得嚟都几有趣：「主力系调理身体，食少啲畀内脏休息，仲要早晚按摩半小时打通穴位经脉，排走五脏六腑毒素，所以完全唔使做剧烈运动，连行街都怕会破气，最多只系做啲拍吓手臂、大髀嘅伸展动作。」饮食方面固然要食得清淡，淀粉质及糖全断，以蔬菜、烚蛋及无糖豆浆为主，自爆头4日饿到发脾气，好不爽，不过，首3日已快速减咗14斤(15.4磅)。

营中只系做啲拍打简单伸展运动。

早晚有老师按摩，打通经脉排毒素。

减肥营以蔬菜为主粮，淀粉质及糖全断。

入营减肥头3日已减咗14斤(约15.4磅)。

入营一周搣走18斤(19.8磅)赘肉，最新体重得返182.9斤(约200.6磅)。

提及日程，她指营友早上9点集合食早餐及做按摩，12时食午餐及午睡，下午5点食晚饭及按摩，晚上9点半要上牀休息，期间会由老师讲解人体结构，最合适食乜，唔应该食乜，细细粒开心获益良多：「原来连饮水及呼吸法都有技巧，要细细啖饮40度恒温水，好似我咁嘅重量，头4日要控水，只能饮1枝半樽装水，因为饮太多水对肾脏唔好，仲要下午5点后不能饮水，至第朝9时半后；另外要配合呼吸法，吸气后用鼻呼5至8秒，再闭气3至5秒，然后换气。」细细粒又提到完成疗程后能保持正常饮食，体重亦唔会反弹，「以前我试过好多极端减肥法，包括中药、食代餐、做剧烈运动都唔得。」最后细细粒都成功减咗18斤(19.8磅)，最新体重182.9斤(约200.6磅)，但笑言目标系减到得返130斤(140磅)。

入营减肥成绩都唔差呀。

第一日早餐：2烚蛋加原味乳酪；午餐：烚菜和白灼虾；晚餐苹果。

第二日早餐：3烚蛋加原味乳酪；午餐：蒸鱼和灼菜；晚餐3生蕃茄和1烚蛋。

第三日早餐：无糖豆浆加1烚蛋；午餐：灼通菜和白灼虾，仲有偷食咗两粒牛肉；晚餐3生蕃茄和1烚蛋。

第四日早餐：加入菜汁无糖豆浆及3烚蛋；午餐：烚鸡腿和炒油墨菜；晚餐2苹果和1烚蛋。

第五日早餐：豆浆加2烚蛋；午餐：2豆浆；晚餐3生蕃茄和2烚蛋。

第六日早餐：无糖豆浆加柠檬水；午餐：蒸鱼配炒丝瓜加1生蕃茄；晚餐炒芽菜及蕃茄炒蛋。

减肥变索非为媾仔

问到刚38岁的细细粒，生日愿望是否变索女媾仔？她大笑说：「唔会喇，我反而想买多几层楼。」近年做带货赚到7位数嘅细细粒，自爆家人在家乡上海已有物业，但她都有在大湾区置业，今年初更「升呢」在港岛区做业主。问到系咪买近亿豪宅？她就保持神秘：「唔系啦，唔讲钱，总之负担得起，哈…我心中富有！」她乘机澄清在纽西兰冇物业，之前拍的纽西兰睇屋片纯为搞笑：「眼见个个话我系隐形富婆，咪拍嚟玩吓啫，我都冇喺当地买楼。」