独家丨陈法蓉反击李婉华：《一舞倾城》唔系童话故仔 56岁轻皱纹冇胶味自爆从来唔Keep

2023-06-10 07:00

陈法蓉（Monica）相隔6年再拍港剧《一舞倾城》，由于剧情惹争议引来不少负评，李婉华就在网台狠批剧集不断强调「卖处」，又多色情镜头，非常教坏细路。Monica就作出反击，认为只是反映现实。另外，56岁的Monica被赞keep得好，访问当日记者跟她近距离接触，轮廓自然唔觉有医美痕迹，这位1989年港姐冠军大方认老之馀，更自爆自己从来唔Keep，更非常偏食，即天生丽质，大家恨唔到。采访：杜杜摄影：谭志光服装:COVEN GARDEN

近睇Monica一样有细纹，但完全冇胶味，靓得自然。

Monica继2017年《赌城群英会》再拍港剧，最初为了陪86岁爸爸曾推却王晶邀请，「第一次搵我就推咗，嗰时啱啱返香港过年疫情比较差，唔舍得离开爸爸，想喺香港陪佢咪推咗，过咗几个月，佢哋再搵我话疫情推迟咗未开，问我有冇兴趣睇吓剧本，睇咗5集觉得几过瘾，有搞笑又有姊妹情，好浓厚90年代港风感觉，我都系90年代人，成件事都几系我。」

Monica为老父一度推拍《一》剧，很珍惜父女相处时间。

1989年Monica参选港姐夺冠，流行发型在「沙律妈」身上重现。

等观众判断锺唔锺意

Monica一直都有上网睇网民留言，好开心播出后反应好热烈，「话好开心见到我再出现荧光幕，又觉得我做得好，好靓女，呢啲（赞赏）都唔系必然，要感恩，第一，我收人工，哈哈！第二，又多咗咁多人赞我，都系赚返嚟。」当然她亦有留意因为露骨剧情引起的负评，「当然会有唔同意见，每个人都有锺意或者唔锺意嘅嘢，好嘅意见我一定会接收！」

Monica称同「沙律妈」一样重情重义，但就唔及对方精明及八面玲珑。

Monica跟一班后辈演员合作愉快，戏里戏外都好感情。

Monica同「沙律妈」一样重情，跟闺密蔡少芬、朱茵和洪欣关系多年不变。

谈到李婉华在网台节目《豪华博客》批评该剧疯狂提及「卖处女初夜」，教坏细路，Monica就认为只是反映现实，而且并非合家欢时段播放，「9点半系家长指引时间，剧集以夜总会为题材，同埋锺少雄导演及晶哥讲畀我哋听系真事，真系有妈妈话唔好嘥咗佢，不如卖咗佢，做戏都系想反映现实啫！蔡洁同我讲有朋友做呢行，好多年冇联络都打畀佢讲『我哋嗰阵真系咁样』，剧集唔系童话式故仔，有现实因素。」Monica觉得剧集有追看性，坦言由观众判断喜唔喜欢，冇话啱定唔啱。又称，「好锺意睇网民写咩，有时睇到剧集嘅Po会有2千几人留言。」

剧中陈星妤演的「KK」，被袁洁仪饰演的母亲强迫「卖初夜」。

李婉华跟林子博及杜挺豪主持网台节目，批评《一》剧狂讲「卖初夜」，教坏细路。

《一》剧制作人王晶还击李婉华过气兼「戏屎」，两人隔空骂战。

憧憬爱情唔急搵对象

56岁的Monica获观众大赞好靓外，连剧中「老公」唐文龙亦不时借朋友把口冧她，「佢好搞笑，成日话啲friend同佢讲，『开心我可以同你合作，话你好正呀』，我就赞佢啲friend有品味，哈哈！」Monica强调冇特别keep，严重偏食的她更只食肉及甜品，蔬菜生果欠奉，亦不爱做运动，她感激父母遗传了良好基因，「我老定咗，年轻嗰阵啲人觉得我个样好成熟，𠵱家到咗成熟时就觉冇变！都系以前个样，呢个系赚咗。」

Monica跟首度合作的唐文龙演夫妻，对方私底下不停口花花赞她。

Monica认为保持年青心态好重要，蔡少芬等经常指她有童心，「话我好细路仔，好锺意幻想，会谂吓可以有咩特异功能，识得透明又点，识得读心术又点。」她又坦言睇电视觉得自己真系老咗，「无可否认真系一个『沙律姐』或者『沙律妈』嚟。」其前经理人赞她「你喺呢个年纪已经系靓」，49岁的蔡少芬又跟她说，「到你呢个年纪好似你咁嘅样，我都唔知几开心」，Monica笑言可以优雅地老去亦系好事。

Monica连身材都多年不变，但她强调好懒做运动。

拍过数次拖，甚至到谈婚论嫁地步的Monica，承认对爱情仍有憧憬，「每次拍拖都会问『你系咪会娶我㗎？唔系就唔好同我拍拖，唔想嘥时间』，但要我爱上一个人唔容易。」现阶段她对拍拖好随缘，「遇到令我觉得两个人比一个人好嘅人，我绝对会拍拖，但我已10几年冇拍。」她又称遇唔到好锺意嘅人，唔会心急去搵，亦唔会觉得一世人一定要嫁一次。「话唔定宝物沉归底我会嫁呢，或者最后都系一个人，𠵱家一个人都几自在，又冇觉得好孤单，有好多好朋友又有屋企人。」