头条戏场丨《犯罪都市：铁拳扫毒》多谢马东石赐我减压妙法

2023-06-12 07:00

马东石主演的《犯罪都市》系列去到第三集《犯罪都市：铁拳扫毒》，韩国好收得，大热勇夺开画票房No.1，我一向唔太理票房，多人睇唔代表啱自己睇，不过呢个系列唔差，每集都有一个大奸角，然后马生就要凭一己之力去儆恶惩奸。今次《铁拳扫毒》大酬宾，有两个坏人，仲要靓仔又大只，呢点好重要。(上映中)撰文:廖思慧

想像吓马生打嗰个人就系你想打嘅对象，真系好舒压好爽。

《犯罪都市》第一集瓦解黑社会，第二集就捣破跨国人口绑架，今次就玩跨国毒品。因为一单女生堕楼案，马东石查案期间发现死者并非自杀，而且同夜场贩卖毒品有关，然后查呀查，又发现贩毒组织由日本黑帮操控，够料做嘢，马生即刻拉人，咁顺利吗?当然冇咁简单，当中包含黑帮二五仔，又有警队害群之马阻住晒。马东石好忙，永远一个打一百个，继续唔用枪唔用剑斋用拳头，睇佢一拳KO啲人渣败类就好治愈，香港好需要佢。

马生去夜场查毒品案，发现有客人公然吸毒即做嘢。

马生有几打得?睇下地下瞓低嗰班人。

完全无冷场
对电影系列一向唔抱太大期望，即第一集系极品，去到第三集通常都负评收尾。《犯罪都市》系列算系异类，可能同马东石唔单止做主角，仲担任电影制作及策划有关，上心啲自然好睇啲。据马生透露已计划8集故事，仲话：「只要观众愿意睇，我就继续拍。」真系唔该晒。

讲返套戏，优点系完全满足入场前嘅期望，即系打戏超密集，马生继续拳拳到肉，几乎秒杀解决，今次仲多咗日本刀手角色，有拳脚又有得睇俐落刀法，即系窄巷中挥刀狂斩几十人，睇得好爽。缺点系剧情好简单，零反转仲要一早自己穿咗自己条桥，坏人抵佢死，好人继续一生平安，加埋都几多笑位，呢期睇新闻睇到好难过的你，想舒压嘅话，入场帮到你。