独家丨韦罗莎为《造星V》集集喊解画：我好自责 做导师一次就够坦认嬲过陈蕾用茅招抢人

韦罗莎（Rosa）继2021年担任《造星IV》第二轮评判后，今届升呢拍住冯允谦任《造星V》的蓝组导师。比赛去到杀入30强阶段，观众对Rosa评价毁誉参半，由最初同情她被陈蕾茅招抢人，到嫌她无论蓝组落败或胜出都会不停喊。Rosa为狂喊解话画，亦认同剪辑上有问题，再介绍返客席导师German即她的老公畀大家认识，甚至首开腔有嬲过陈蕾用茅招抢人，亦讲明做导师一次就够，冇下次。采访：杜杜 发型:Oscar Ngan 服装:ISSEY MIYAKE

全情投入做导师的Rosa，讲明冇下次，「真系觉得几甘，呢啲经验有一次就够。」

讲到做导师缘由，Rosa表示接到监制邀请时，都唔敢即时答应，「我连真人骚都冇拍过，都担心做唔做得嚟，但系既然佢哋搵得我，即系觉得我可以胜任，点解唔接受呢个challenge呢？我即刻打畀经理人，又同German（老公张铭耀）倾都觉得应该做，German当时已经讲『咁即系我都要做啦』。」之后Rosa第一时间搵去届导师梁祖尧攞料，「我系当面问阿祖，佢叫我有定心理准备冇乜时间凑女，因为会愈嚟愈投入，唔会放过佢哋每一次排练，都真系，第二round小组开始，我会主动check佢哋喺边度练紧，就会冲去睇佢哋。」

Rosa在上届《全民造星IV》，出任第二轮比赛评判。

开始做导师前Rosa已听到梁祖尧忠告，会少了很多时间陪囡囡张宇澄（Mia）。

预告比赛后期继续喊

对于被指经常喊，Rosa就解释因第1轮小组比赛蓝组以4比1惨败，她好自责，「好多个仔初赛表现都好好，我哋以为唔使畀咁多意见，怕变咗系我哋嘅嘢，等佢哋好好发挥自己，但原来系唔得，佢哋啱啱开始小组比赛，要同一啲唔识甚至嚟自海外嘅人沟通同组队，仲要得两星期咁短时间，又要磨合又要度表演同排练，佢哋完全应付唔到，我哋真系掉以轻心太迟先发现，仲要见到另一组人做足晒，所以觉得对唔住佢哋，要foul人真系好心痛，加上我本身都易喊。」Rosa预告比赛后期泪腺依然发达，「愈了解佢哋愈知道每个都有背后故事，好似有啲屋企人反对，有啲要辞咗份正职，牺牲咗好多嘢嚟比赛，所以成日都会令到我好感动。」

其实由94强晋入60强开始，已经成日见到Rosa喊包样。

第1轮小组比赛蓝组以4比1惨败，令Rosa相当自责做得未够。

Rosa大爆一班囝囝为排练投入到唔返屋企，「Adams去海外参赛者好似Ash间房瞓咗几日，搞到要去买底裤。」

对于制作组剪辑方式受质疑，Rosa都有嘢要平反，首先当然是60强开始坐在他身边的German，真正身份是她老公张铭耀、著名舞台剧导演兼演员。Rosa解释搵老公帮手因自知本身演员出身，始终不及做开导演的German宏观，识得安排舞台走位及打灯等等，所以头轮小队对赛时已不停问老公意见，「我晚晚返去攞啲片畀佢睇，又问佢呢样又问佢嗰样，问到佢索性话『我直接去睇嘞』，佢真系帮咗好多忙，佢一睇就知啲走位有咩问题，灯光点样执会好啲，𠵱家佢同ViuTV啲灯光师都熟咗，哈哈！」

Rosa感激老公German出手相助，令参赛者表演质素提升很多。

嬲完陈蕾再为佢平反

另外Rosa亦要为陈蕾平反，有指对方睇演出时的表现，有踩蓝组队员之嫌，「嗰日我哋4个导师开live都讲，陈蕾上一轮讲咗句『Kakit（79号）唔适合跳呢类舞』，同埋佢赢咗掉个咕𠱸都俾人闹，其实佢赞咗Kakit好多句都冇剪落去净系剪呢句，佢掉咕𠱸因为赢咗太开心，但要养声唔嗌得咪唯有掉咕𠱸罗！」不过问到初选拣人时被陈蕾阻住，Rosa需唔需要帮陈蕾平反？她就笑言：「嗱！两样嘢嚟，嗰时真系有嬲！放完break返嚟估唔到佢哋会咁样做，但系都明白开始时，我哋真系抢咗好多人，所以后尾都冇放喺心，我同陈蕾之前都因呢件事倾咗个几钟电话。」

Rosa为陈蕾平反，对方其实好锺意Kakit，赞多过弹。

Rosa坦承当时有嬲过陈蕾，不满对方用茅招阻住抢人。

Rosa同陈蕾冇心结，因明白对方抢唔到人好心急。

 讲到跟冯允谦拍档做导师，虽然两人初次合作，但大家好夹，「我哋啲谂法好接近，所以沟通得好好，譬如我哋都认为唔应该拣一个类型参赛者，有啲外形未必好好，但都可以有吸引人嘅地方。」问到心水三甲，她怕剧透只肯讲红蓝两组的欣赏队员，「红队，我锺意Tsoul（35号），我一直都欣赏佢，可惜嗰时抢佢唔到，但睇到佢喺咁多场比赛表现都好出色，有自己创作同谂法；我哋蓝队就好锺意乐乐（53号），佢把咁靓嘅声真系好少有，但其实佢好细个（20岁），我同佢倾偈都会问佢真系咁细个咩，因为佢有种完全ready嘅感觉，只要再栽培吓，应该会更加好。」

Rosa欣赏红队的Tsoul（左），有创意又有谂法。

Rosa最爱自己队的乐乐（左），劲唱得又年轻，前途无限。

《星岛头条》新网站有更多精彩内容：http://www.stheadline.com/

《星岛申诉王》100集诞生之我最喜爱影片票选，由6月16日至6月30日，玩游戏赢取总值超过10万丰富礼品！
立刻点击投票👉🏻https://tinyurl.com/38dfzwtv