古天后日志｜成交薄弱说明港股仍困闷局中

6月28日，大致多云，有几阵骤雨，早段局部地区雨势较大及有雷暴。隔晚美国公布消费者信心指数好过预期，美股即反弹，三大指数向上，道指升212点；标指逼近4300见支持反弹，目前仍于高位徘徊，隔晚回升49点；纳指则升219点。VIX目前不足14，仍然系低位，暂时美股唔似会转势，一旦VIX升穿17/18就要小心。

美股暂时喺消息面上较为薄弱，俄罗斯嘅内乱来去如风，暂时威胁解除，呢方面对资本市场暂未有太大负面影响，市场焦点系去返7月份FOMC嘅议息会议上。鲍佬一直未肯放鸽，更指今年减息无望，而且仲要加息一至两次。美股之前炒减息效应，奇怪系鲍爷都讲到明今年唔会减息，美股未有因此回调，睇嚟目前美股流动性仍然充裕。咁嘅情况下，似乎要注意资金流向，比消息面更为重要。

年初时，大家都睇死美国经济或陷入衰退，结果美国经济并未有预期咁弱，刚公布嘅消费者信心指数由102.5升至109.7，反映喺美国大型企业裁员潮浪接浪下，美国民众消费习惯未受影响，呢个系美股上升所带嚟嘅财富效应所致。不过大摩继续其魔笛追魂，指6月就业数据会出现大幅放缓，8月份更有可能出现负增长，第四季开始非农就业人数或保持不足10万人，至2024年减息后情况先会有好转。不过大行嘅预测，参考下咪算数，有几准确，大家心中有数。

港股明日结算，喺结算前夕，转仓高峰期呢两日，预咗又系啲日升日跌闷局，不过只要睇住成交额，基本上港股仍然系买卖两闲，都系嗰句，欠缺成交支持下，只系大户操控指数上落，个别股份或板块随消息炒上落，但欠缺人气无人跟炒，一个唔小心高追，资金又被锁，散户韭菜被割得多已学精，宁食花生唔入场，成交只有继续缩水，咁嘅情况下，实在睇唔到港股会有转机，闷局继续，只怕咁落去，迟早又阴乾。