古天后日志│港股A股化明显 再失十日线即转势向下

7月5日，部份时间有阳光，间中有一两阵骤雨，天气炎热。隔晚美股休市，欧洲股市略为回调。欧洲喺未来几个月，会再对微软展开新一轮反垄断调查，上次微软成功和解已赔偿了22亿欧元，过去半年微软股价因ChatGPT而大幅走高，但市场ChatGPT概念股热度正在减退，小心热度减退会引发板块资金流出。而美股一直系靠几只重磅股支持住，一旦资金流出，或引发美股出现较大幅回调。

不过从资金面去睇，暂时都仲系risk on，唔觉唔觉BTC已重返3万楼上，美汇指数喺100至105之间上落，人民币跌穿7算后，虽然曾一度回升至7.23水平，可惜未能突破7.2水平，维持弱势。目前内地经济复苏缓慢，出口疲弱，喺咁嘅情况下，阿爷自然默许人仔贬值去带动出口，但中美息差高达1%，喺持续贬值下，资金只会外流，人民币即使有反弹，亦难重返7算。

虽然港股7月开局睇落唔错，无奈升市几日未见成交配合，讲到底又系挟淡仓多过似真升市，噚日恒指虽然重上20日线，但全日成交额只有760亿，买少见少。呢两日急升嘅电动车股，全靠数据公布刺激，但呢个消息能否支持股价继续高企，呢点古天后有所保留。至于噚日急升嘅医药股，基本上只系跌至52周低位后反弹，空仓回补令股价急升一转，同样系无资金跟进，顶多系资金入场短炒，日跌日升。

市场憧憬耶妈访华会有好消息，但上次国务卿访华，其后美国进一步收紧对华输出AI晶片，即系表面关系破冰，但美国对华政策未见真正放松，估计今次耶妈到访，都只系游说中国多买美债，讲到底，中美关系都系睇利益。暂时港股短炒要手身敏捷，否则都系见财化水，长坐买货，就要分段预咗要捱价，因为未见长线基金入场，唔够子弹坐，又或无耐性者，呢啲时候入场，都口有被折磨。港股暂时都系上落市，有波幅，冇升幅，A股化明显，只要望望A股嘅各大指数，大家对恒指未来表现都心中有数。