专栏｜日本门将还待新星

今个月「猜波台」睇咗两个星期日职，相信大家都感受到娱乐性有几强，尤其系龙门嘅表现，令到球赛绝无闷场！

艾尔相当尊敬嘅门将西川周作，估唔到可以喺对川崎前锋嘅关键大战上，展示用脚「弹琵琶」，喺自己龙门面前控甩波，结果被追和，浦和红钻可以话痛失2分。另外，川崎前锋嘅上福元直人、湘南比马嘅宋范根等门将，同样有「炸弹级」嘅表现，实在睇到黑人问号。

唔止日职，唔少外流过嘅日本门将表现都麻麻哋。当中，上届世界杯正选门将权田修一，喺对德国一战上演过廿秒挡四球嘅精采画面，但日本第一个失波，正系佢喺禁区内嘅卤莽拦截，令对手凭12码领先。另一位老大哥门将川岛永嗣，喺法甲打滚多年，表现亦唔算太抢眼。

喺度唔系鸡蛋里挑骨头，只系眼见日本近年嚟咁多球员外流后脱胎换骨，唯独门将呢个位置上，艾尔觉得都系弱啲，无论系饭仓大树、前川黛也等较为年轻嘅日职门将，都接唔到棒，一众老将又高峰已过。

如果日本想喺世界杯上攀上更高位置，艾尔觉得除咗9号位之外，门将嘅新旧交替系嚟紧非常重要嘅任务。艾尔

-----

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ