古天后日志｜内地经济数据强差人意 中港股市难有起色

7月18日，多云，间中有狂风骤雨及雷暴，初时部份地区雨势较大。美股踏入业绩期，上周五高开低走，但隔晚喺Tesla跟苹果等创新高带动下，高开高走，三大指数向上，纳指跟标指更升穿今年高位，道指升76点；标指跟纳指分别升17点及131点。市场预期本月联储局再加息0.25%后，将停止加息，息口快将见顶，好友仍主导大市，高盛表示喺6月份，对冲基金出现过去32个月以嚟，最大单月空仓回补，反映美股喺本轮升势下，淡友不得不投降。

值得留意下周一纳指将出现rebalancing，本来占纳指比重超过五成嘅7只权重股，将由56%降至44%，即系纳指由科技龙头带动嘅情况有所改变，估计下周一将有近百亿美元追踪纳指基金，将按变化进行调整，7只权重股或按比例被动减持，可能会影响纳指表现。

美股业绩期展开，上周五嘅银行股率先揭开序幕，基本上银行股业绩表现都系优于预期，早前已见资金偷步买货，所以公布业绩后，嗰堆银行股都系高开低走，有获利盘涌现。今晚轮到美银及高盛喺盘前公布业绩，留意美银手上信用咭业务增长如何，坏帐率会否上升。

至于隔晚带动大市上升嘅Tesla，首部Cybertruck量产车下线，股价业绩前偷步炒上，隔晚升3.2%，周三晚收市后有TSLA业绩。今年各电电车均以减价抢销售额，内地醠有车厂出现经营亏损，连阿爷都要出手调停，各大车厂暂承诺唔再减价。不过Tesla以另类方式变相减价，推出「介绍费回赎」优惠，即是变相减价。目前预估第二季度Tesla毛利率仍会低于20%，虽然营收增长有望超越40%，但估计喺毛利率下降嘅情况下，盈利增长唔会多过一成。以其目前股价接近300美元，PE高于80倍嚟计，股价能否喺业绩后持续高企，仍要睇市场嘅接受程度。

至于中概股方面，隔晚系逆美股而行，而上周五夜期跟ADR港股表现不济，噚日因为台风休市，今日返嚟港股难免受压，主要系内地噚日公布嘅经济数据继续差过预期，反映内地经济增长仍未及预期。加上恒大拖咗咁长时间，终于喺周末公布过去两年业绩，2022年总营售2300亿人仔，毛利只有249亿，毛利率只有10.8%，经营亏损433亿，另外还有693亿的土地被收回、金融资产减值等亏损，再计及所得税开支130亿，合计净亏损1258亿元。呢份业绩当然系未能够令恒大可以够资格复牌，过往唔少人仍抱一丝希望，恒大公布完业绩可以复牌，但一间公司已经半死，进入植物人状态，就算出咗验身报告又如何，植物人就系植物人，长期昏迷醒唔返。呢份业绩令人最傻眼嘅地方系，集团总负债高达2.43万亿，其中有7210亿合约负债，即系欠已卖出业主嘅金额，馀下的1.71万亿，其中6123亿系借款，其馀1万亿系贸易帐欠款，其中拖欠工程供应商便高达5961亿，呢啲欠款都系烂帐收唔返。

恒大呢份业绩，可以清楚反映目前内房产业嘅困局，过去一直靠房地产业支撑整个经济，呢个产业链崩溃，中国经济神仙都难够。单系睇返个青少年失业率达到两成以上，内地经济想喺Q4复原，似乎无乜可能，经济唔好，自然无资金肯投入股市，想内地跟港股翻生，唯有睇阿爷有冇乜嘢新招推出救经济，暂时睇嚟睇去，都睇唔到阿爷仲有乜招可以出。