专栏｜尚未证明 西法女足不宜高估

西班牙啱啱喺女子世界杯以3:0轻胜哥斯达黎加，赢起上嚟清风送爽，简直系兵不血刃。「狂牛」嚟紧分组赛只系面对日本同赞比亚，出綫问题应该唔大。

西班牙阵中大部分球员嚟自巴塞隆拿，控球组织方面已经赢在起跑綫，咁样系咪代表可以挑战冠军宝座呢？艾尔就不敢苟同喇！虽然巴塞隆拿近年喺联赛同欧联嘅表现有所进步，但西班牙喺世界杯同欧国杯嘅成绩无明显嘅提升。况且，西班牙大炒对手嘅赛绩，都系同啲级数较低嘅球队比并，对住德国、英格兰、美国、瑞典等实力较强嘅球队，「狂牛」嘅优势唔太明显。

法国嘅情况同西班牙差唔多，阵中唔少球员嚟自横扫8届欧联冠军嘅里昂，但球队至今仲未捧过欧国杯，上届世界杯有晒主场优势，都喺8强输畀美国出局，成绩亦比较波动，同其他欧洲强队仲有些少距离。当然，「高卢雄鸡」今届有转教练嘅变数，但从人脚实力同过往赛绩嚟讲，艾尔唔觉得法国可以成为今届冠军。

毕竟女子足球近几年先冒起，唔少国家队嘅根基尚未打稳。西班牙同法国大有进步空间，但呢刻要挑战世界最高嘅位置，似乎言之尚早。艾尔

-----

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ