星8卦｜「阔太」望夫成龙急进输身家靠做擦鞋仔博翻身

2023-08-04 11:30

近来无乜嘢都唔好去招惹「阔太」，因为「肥佬」真系周身唔掂。想当日为咗嫁，「阔太」放弃自己嘅大好事业，觉得女人未结过婚系失败。佢一向做阔太大家姐，成日要充到好有面，「肥佬」系无乜本事，但胜在呃得下人，就话佢祖业在北方，潜力大家估唔到，仲要自己去买只7位数钻戒，话系「肥佬」嘅求婚戒指。

女人希望自己身边嘅男人成材无可厚非，最惨「肥佬」真系烂泥无出息，「阔太」卖晒啲家当帮佢创业，初时都有啲起色，但遇着呢几年，除非真系屋企大把至顶得住，已经唔系人材嘅「肥佬」更加输到「阔太」全副身家都无埋。

而家两公婆等紧一条大水喉帮手，但条件系要「阔太」帮佢做跟班，服侍一家人，随传随到。「阔太」个心梗系好滚，但呢关过唔到两公婆就好大镬，随时身败名裂。「肥佬」一向唔理外面发生乜事，因为咁多年都系老婆话点就点，今次佢好醒叫「阔太」忍下，鬼叫自己无名气帮唔到手。可以想像「阔太」心情有几差，简直系朋友勿近，唔系怕佢借钱，系受唔住佢嗰啲怪脾气，个个都避开，祝福佢过到呢一关！