玉泽演举行韩星史上最宠粉FM 两个半钟唱足9首歌落台8次任Fans狂揽

2023-09-30 17:45

韩国男团2PM出身，成功由idol转型艺人的玉泽演，在韩综《一日三餐》丧吸妈妈粉，剧集《打架吧鬼神》及《黑道律师文森佐》等亦深得观众喜爱，熟知泽演的Fans都知偶像好nice，同一般韩星超级唔同，架子系零，但估唔到可以去到任揽程度。昨晚泽演在九展Star Hall举行人生首个《2023 OK TAECYEON in HONG KONG : SpecialTY》粉丝见面会香港站，唔只唱广东歌，尾声更大唱2PM的《Champagne》、《Promise(I'll Be)》及压轴全场大合唱的《Hands Up》，全个FM有数唔到咁多高潮位，叫以后啲韩星点跟?采访:廖思慧

泽演又唱又跳《Magic》、《Anyway》揭开序幕

泽演举行人生首个FM香港站

唱跳完即以广东话打招呼

搭正八点，穿上开胸黑衫及黑裤的泽演又唱又跳《Magic》、《Anyway》揭开序幕，展现2代团的精湛实力。唱毕疯狂流汗的他以广东话跟HOTTEST（粉丝昵称）打招呼︰「大家好，我系玉泽演，好开心见到大家，好挂住你哋，欢迎大家嚟到Special tour，希望大家度过欢乐嘅时间，开始之前为大家介绍今日嘅MC。」

泽演坐咗一段时间都仲流紧汗

话明粉丝见面会，重点当然是跟粉丝有无限互动，泽演有别一般韩星，同粉丝互动量达到宇宙级。

宠粉之一任揽

FM前粉丝们在memo纸上写下愿望，泽演随意抽出再给予实现，大部份Fans都是求合照及揽揽，泽演唔只做到足，仲要跳落台下，走到幸运Fans面前自拍加抱抱，有求必应之馀仲要惠及冇份抽到嘅粉丝，可以近距离接触偶像，路过仲可以击掌兼互动做心心，FM开始冇耐已经去到第一个高潮位。

拣完幸运FANS即落台实现愿望

落台搵FANS合照

好近呀

好幸福又好冷静嘅FANS

任揽行为相当不得了

不忘同旁边粉丝畀心心

仲可以击掌

宠粉之二乜都讲
玉泽演在第二个环节分享了三张拍戏时的照片，一张是剧集《为你心动》中的吊威吔的片段，他坦言：「其实我有畏高，所以都唔知道嗰时系点拍。」又提到自己锺意夏天拍摄，多年前拍剧集《Dream High》，因为太冻连对白都讲唔到，甚至唔想落车，仲话要克服环境因素好难，所以之后好几年都夏天先拍剧。不过，因为拍剧通常要拍7至8个月，所以笑言点都会横跨两季。

大讲拍摄趣事

宠粉之三唱广东歌
外国人讲广东话已经难，仲要唱广东歌，不过难唔到高材生兼语言能力超强的泽演，特别为FANS演绎冯允谦的《给缺席的人唱首歌》，他称广东话发音同韩文完全唔同，非常之难：「喺屋企一边听一边练，工作人员标记韩文发音，但我一听已经知唔标准，当中ngo最难发音，如果有唔准嘅地方请多多包涵。」虽然咬字的确唔准但诚意加感情搭够，连原唱者Jay Fung都好惊讶，认为首歌本身已经唔易唱，但泽演勇于尝试，非常赞赏。

泽演真系好有心

原唱者都转发片段

仲赞好

宠粉之四送礼有「味道」

第三个环节「Special thank you」，泽演在透明杯及T-shirt上画画再签名，更扮饮透明杯一啖，全场大叫，最后更亲自冲咖啡，并装入画满图案加签名的保温杯，同样饮咗一啖再送畀粉丝，全场停不了的尖叫。

为透明杯加图案

加完仲扮饮

喺黑色TEE签上中文名

留意返,件衫泽演著过上身再除出嚟送畀FANS,好羡慕呀

宠粉之五人型太鼓之达人

FM玩足两个半钟至10点半，唱足9首歌落台8次送礼的泽演说︰「好开心，好耐无嚟过香港，粉丝依然好热情。中秋系跟家人团聚嘅节日，今晚粉丝成为我嘅家人，永远唔会忘记2023年嘅中秋喺香港度过。」最后欢送环节，泽演在出口处同FANS逐一拜拜，更会对应FANS的动作兼有眼神交流，如人型太鼓之达人，仲要光速进行，难得佢仲笑容满面。完成FM，佢仲极速开IG LIVE品尝香港FANS CLUB送赠的麻辣味啤酒，离开时又同在停车场等候的FANS打招呼，甚至上车后驶离九展时见到有FANS在路旁，都校低车窗，停一停同FANS讲拜拜，宠粉之霸当之无愧。