专栏│不再李输十成 狐狸势争升班

上季从英超降班嘅李斯特城，季前有主力如占士麦迪臣、苏恩古、哈维班尼斯等离队，但仍能以7胜1负21分喺本轮前英冠排榜首，究竟狐狸有啲咩行动令佢地暂时站系英冠之巅？

李斯特城今年夏窗大执位，前中后都有变动，后面先收购有英超经验嘅高亚迪，亦都借左高云地利既后生左闸哥林杜尔，可以话有唔错嘅补充。中场铁三角，重心一定系来自热刺嘅哈利云克斯同埋从车路士外借意大利新星卡沙迪，中线做波质素的确提升唔少。前线人才一定系最多，既有阿仙奴出身并踢咗蒙彼利埃一段时间嘅马维迪迪，又借入加拉塔沙雷嘅左脚仔尤尼斯阿克根，再配合年轻小将基斯麦卡迪亚及伊沙赫古。

领队一职就改聘了曾执教曼城青年军嘅马利斯卡，为何要谈及佢嘅曼城血统？原因很简单，又系将一只闸收入中间组成3223阵式，而呢个位置都系交由列卡度佩雷拉去做，以前英超睇到佢嘅卖点都系冲入禁区嗰一下嘅突袭，但而家将佢摆前一格做波，正正有利于新阵式同踢法。同时亦要提到中场，哈利云克斯经常逗后帮手组织，而尼迪迪则被摆前一格改造成box to box，效果亦唔错，防守时又可以作第一道防线。前线方面，伊恩拿祖打顶嘅能力的确有进步，可以创造机会比后上中场入楔，今季他合共创造6个入球机会全英冠第一，进攻能力真系可见一班！

至于防守，虽然8战失5球仍系英冠最少，但始终一对中坚菲斯及韦斯达加特仍然令人唔系好放心，不过李斯特城始终整体球员质素较高，加上板凳深度足够，绝对足够升班，今年一于贴狐狸冲超成功。Willhappy

-----
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ