古天后日志｜中港上市企业管治质素差 赶客行为令资金却步

10月3日，部份时间有阳光，有一两阵骤雨，下午天气酷热。美国国会通过临时拨款法案，避过政府停摆，其实都系意料中事。每次财案通过前，两党必定玩嘢以争取政治本钱，到限期前两党定必达成共识，美国政府从未因此停摆，大家已见怪不怪。再有美国联储局委员放鹰，10年债息又创新高，美股个别发展，道指跌74点；标指几乎持平，纳指则升88点。VIX大约喺17水平徘徊，好淡双方争持。标指4300水平攻防战。

美国息口即使唔再向上，但保持高息引发资金回流美元，美汇指数反弹至107，由于市场已再无低成本资金，资金紧缩下，环球股票市场压力增加，对息口最敏感嘅科技股，亦无以前咁热炒，投资者热情开始冷却。

即使如此，但暂时未见科技股被大幅抛售，反而当呢堆股份跌至近日低位，有买盘低吸，即Tesla喺250美元楼下；苹果公司喺170美元楼下，以及英伟达低见420元以下，即见买盘出嚟捞货，呢个正正系美股虽见调整，但未见被大幅抛售嘅原因。

目前已有16间美企公布第三季业绩，其中15间美企都好过预期，另外逾百美企调高第四季业绩指引，喺业绩支持下，资金已偷步入场买货。美企嘅业绩表现，支持美股高企，亦反映美国经济无预期咁差，企业收入仍能保持增长，而去年嘅裁员潮开始，唔少公司喺成本控制方面大有改善，开始喺今年第三季业绩上反映。

港股上周喺长周末前偏静，北水喺上周五开始放假，恒指当日就趁北水缺席大挟淡仓，恒指挟升436点，收报17809，但成交额只有676亿元，心水清都知道系纯粹假期前挟一挟淡仓，唔畀淡友假期坐得舒舒服服。人民币弱势下，中港股市难有作为，ADR隔晚已回软，又重返17600水平左右，估计今早都系低开。

港股目前仍然系面对资金不足问题，升市无人追货，跌市亦无货可沽，虽然港股估值已届合理水平，但长期缺乏资金入场，升升跌跌只系炒指数嘅大户操控，港股暂时未见有吸引力能吸引资金入场储货。虽然阿爷出招打击主要股东减持，亦限制基金恶意沽货，但长远要吸引资金重返中港市场，中港股市嘅上市公司，管理质素先系重点，若两地上市公司，一直只系大股东玩财技、割小股东韭菜嘅工具，呢啲行为只会继续赶客。

至于港股呢边，市场虽场憧憬10月底政治局常委会会议或出台新政策，以及特首喺10月25日发表新一份《施政报告》，政商界连月来促请政府为楼市「减辣」、股市「减税」，但呢啲措施，或只能对港股带嚟短暂提振作用。外资一去不返，缺水问题唔解决，港股只会继续有波幅、冇升幅，如何吸引外资重返中港股市，先至系重要命题。

相关文章：

港股开市｜中国恒大复牌曾升逾四成 恒大物业倒跌 许家印被骂「骗国家骗老百姓」

---
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ