专栏｜曼联遇强难再「呃呃氹氹」

今晚曼市打吡，赛前大家都会谈论奥拿拿同哈利马古尼欧联终于争番一口气，曼联𠵱场波有无机会乘着近期气势赢埋曼城？

曼联已经各项赛事3连胜，话虽如此，但只要我哋睇深一层，每一场波嘅比赛进程都系有大量沙石，3场波都系围住个禁区嚟搓，但渗入唔到敌方禁区。只要谂番3场嘅入波，就可以发现到曼联每一场波都系要靠球员挺身而出，第一场麦汤米尼嘅神来之笔补时连入两球反超，第二埸靠达洛治超靓远射得手，第三场就系马古尼透过1次角球，产生出1个斩波头槌入球。显示得出都系球员质素加上少少运气所产生，面对实力雄厚嘅曼城，真系可以再一次发生？
3连胜只系假象

失误众多都系曼联其中一个死症，曼联已经连续两场都输十二码，幸好奥拿拿欧联尾段扑出极刑保住3分。同时成套Build Up由4后卫变成3后卫亦都经常断缆，好易被对方打反击，造成人多打人少，面对二线球队可能有得救番自己嘅失误，但对上一针见血嘅曼城应该会受到严重嘅惩罚。

曼城近期都有唔少利好嘅消息，有洛迪卡斯简迪复出，改善中场梳理，控制节奏嘅能力。又有重大发现祖利安艾华利斯原来最适合做艾宁夏兰特背后嘅男人，经常后上插入搞掂。刚刚欧联亦都作出唔少嘅轮休，体力亦都占号上风。

总括而言，曼联呢场波攞1分都非常因难，睇嚟都会俾曼城辗压，但作为猜波台主持，都希望声音旁述一场刺激而精彩嘅比赛，同时又要避免自己入「讲胶所」，只好勉勉强强推上盘一波。Willhappy

-----

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ