星8卦｜「阿太」心野想搞不伦恋上位被「无敌」直白踢爆收皮冇瘾

2023-12-08 11:30

咪睇「阿太」真系好似良家妇女，都话好似，所以都系一场演技。「阿太」好细个就同「叮当」一齐，奉子成婚之初，两个都冇乜钱，好彩「叮当」之后遇到伯乐，将佢培训又畀机会，总算养得起头家。问题系「阿太」未见过乜嘢世面，所以喺「叮当」红咗之后，开始见识到世界好精彩。

「阿太」觉得自己唔够靓，年年月月都去微调，成个样变晒，但「叮当」又真系唔介意，毕竟老婆陪自己捱过世界。「阿太」唔知足，见到「无敌」人气劲，又好似同「造型」唔多妥，无乜感情，成日搵机会喺大场合勾搭「无敌」。可能佢份人系人都讲得两嘴，一吹就两三个钟唔停口，「阿太」捉错用神以为佢对自己有意思，所以谂多咗。

「无敌」结婚前系夸张啲，同时期有两三个，但自从同「造型」奉子成婚后，成个人变晒，只不过「造型」份人好慢热，唔会喺人哋面前晒恩爱，江湖咪成日传两个唔掂。好衰唔衰「阿太」收错料，谂住借「无敌」嘅人气等自己上位，又唔谂吓老公嘅感受。「叮当」当然收到风，但为咗头家唔想反面，好彩「无敌」知道「阿太」想同自己发展不伦关系，换咗第二个会玩吓，因为玩完可以各自返屋企，但「无敌」直情同「阿太」讲唔好搞咁多嘢，从此喺公开场合避开唔见，所以有两个人不和嘅传闻，但就无乜人知内情罗！