赖慰玲喊住赞暖男黎诺懿吓亲:咩事呀大佬首次全裸拍《婚后事》公开拍摄血泪史丨独家

2024-03-13 07:00

黎诺懿和赖慰玲（Winki）在话题剧《婚后事》中首合作，两人由情侣演到夫妻，有连场电视尺度边缘的「爱情动作戏」，暂时最激一幕是男方露股，再跟裸背Winki在浴缸谈情，此幕更令入行22年的诺懿荣登「TVB股王」。人妻兼妈妈Winki大赞诺懿系暖男时更感动到喊，吓到男方唔知点算，「哗！咩事呀大佬！」采访：杜杜摄影：谭志光

诺懿和Winki互赞对方是个值得信任的好对手。

诺懿对Winki信任度极高，「佢提议嘅演法我都愿意尝试。」

Winki对诺懿的信任程度，令她全裸也不尴尬。

能够遇到一拍即合的对手，两人都觉得很幸运。

诺懿和Winki鸳鸯戏水一幕好浪漫，两人笑言拍摄过程相当搞笑。男方睇剧本时已知要露股，监制事前亦有问他：「使唔使操个股，我话点操㗎？！」而太太李洁莹亦不太满意其身形，「佢唔介意我除衫，但系可以fit啲，佢见过我最fit时候，影婚纱相，连人鱼线、箩抽都起晒𦟌，嗰日个『箩柚』，以依家岁数（43岁）可以啦！」Winki提议他，「到时夹实啲就得！」诺懿笑住拒绝：「好难夹实讲对白，未识咁高技术！」问到拍摄时有否清场？诺懿笑言：「拍AV咩？做乜清场，剧组梳头化妆PA都系女仔，冇清场。」监制林肯本已安排肉色裤给男方打底或黐胶纸，但他放弃，「监制话key返个『箩柚』，又话黐前面，咪好痛？我话唔使咁烦，有块磨砂玻璃，拍嘅时候除咗条肉色裤，佢话你唔好突然走出嚟，哈哈！」Winki亦要求诺懿，「唔好拧转身，除裤话我知，我唔望！」

诺懿露股，Winki大露背，挑战电视尺度。

诺懿10年前的结婚相，腹肌操得好靓。

全裸拍摄的Winki和诺懿，要互帮对方防走光。

Winki无奈全裸拍摄

Winki以「出世以来最激一次」形容浴缸谈情戏，收到剧本有问监制是否有需要，「点解要喺浴缸倾偈，喺牀倾或者着返衫唔得咩？！」跟监制讨论后，明白两人肉帛相见更能讲出心底话，「好怕呢啲性感嘢，知道要拍好恐惧。」不过她庆幸对手是诺懿，「拍摄个几月，建立咗好强嘅信任，唔会觉得尴尬。」拍摄当日她严阵以待，但打底时却出问题，「黐咗几卷胶纸，以为准备得好好，但佢哋惊我冻亲，用好热嘅水，一落水胶纸就溶，上嚟再黐，场地时间又够嘞！其实诺懿全裸，我都系全裸㗎！我搣走晒胶纸用手掩住，亦都有啲泡帮我遮吓。」她在恐惧下拍这场戏，好彩诺懿帮她防走光，「如果第2个我真系唔够胆，对住你我系完全冇尴尬。」

在水温超过40度下揽锡，这场鸳鸯浴拍得非常辛苦。

剧中诺懿和Winki有大量情绪波动戏份。

Winki拖诺懿手入戏

Winki跟诺懿首度合作已互相信任，全因两人试过深度对话更了解对方，「我问佢以前系咪成日媾女？佢话唔系！仲讲咗少少历史畀我听，望住佢开始有感受，条友成日扮坏人，其实都系小男人！咩人先会扮坏人呢？！真正嘅好人，我开始搵到佢呢面，其实佢系暖男，好细心，拍摄过程照顾咗我好多。」Winki讲到眼湿湿，「哗！有啲感动𠻹！越嚟越欣赏呢个人，可以喺呢个过程奉献自己畀佢。」Winki越讲越激动，喊到要离场搵纸巾，诺懿都吓亲，「哗！咩事呀大佬！睇吓佢几咁爱。」诺懿亦好信任Winki，最难忘对方入戏方式，「有日拍佢发癫、情绪崩溃戏，佢突然埋嚟话『可唔可以拖住我』，好少有人咁样，跟住佢自己培养感情，平时我都会嘻嘻哈哈，嗰阵唔敢嘞！」

Winki要靠拖住诺懿的手来投入角色。

Winki赞诺懿期间，突然眼都红晒。

Winki最后忍唔住喊，要攞纸巾抹眼泪。

诺懿忙筹备结婚周年

两人都大赞另一半好支持他们，诺懿太太还会陪他一齐煲剧，「同太太睇多数会用多1倍时间，佢会pause问好多问题。」黎太亦好放心老公拍感情戏，「佢唔会觉得我拍一套就锺意一个人，会觉得好得意𠻹，少见嘛！」就算这次有大量激情场口，一样冇投诉，「佢会话『唔使锡返老婆㗎』，锡返啖咪冇嘢罗！」Winki的舞台剧演员老公梁子峰，同样不担心，「佢嘅金句系『你系咩人就系咩人，如果系乱嚟嘅人，唔需要有对手，做任何工作都可以走咗去』佢系智者嚟，而同我个history都几好，会有一定信任。」两人拍完剧，均有审视自身婚姻关系，认同平淡是福。Winki说：「太激烈嘅感情、婚姻好攰，留返喺戏剧世界几好，好庆幸有简单幸福嘅婚姻！」诺懿亦相当认同，仲自爆生了两个囝囝后，经常被太太投诉冇时间过二人世界，为将太太放返首位，努力搞紧大project，「今年结婚10周年，老婆问有咩搞？佢话『唔要一家系你同我呀！』我谂紧㗎嘞，好上心，你见我冇接公司任何project，搞掂呢单先，呢个劲过大骚，Live骚都搞得掂，呢个搞唔掂，我要绝迹嘞！哈哈！」