鲁振顺笑谈「母子」关系：分房瞓玩神交顶唔顺军训管治女友升华变阿妈丨独家

2024-03-14 07:00

66岁鲁振顺(顺顺)一直被误会是同性恋，直至3年前高调宣布有女朋友，幸运儿是40多年前于歌唱比赛认识，细他6岁的Julie，拍拖仅4个月，顺顺即落实翌年娶妻，两人更过住同居试婚生活及验精准备生仔。不过，黄昏婚礼等极都冇，去年5月，顺顺改称Julie为「老母」，更指两人如同母子般血脉相连，坦言，「我哋系灵魂伴侣，应承帮佢生养死葬。」采访：方骞平

鲁振顺冇Julie管后变得风骚。

顺顺最爱做自由人。

𠵱家跟Julie相处最舒服。

顺顺话「登六」后唔使性生活。

鲁振顺感恩每一天。

鲁振顺嘅婚讯讲足3年，最后女友升华至「顺妈」，当然婚事亦告吹。对于被指煲「无米粥」呃曝光，顺顺有啲劳气：「佢为乜要同我夹(新闻)呀？佢有佢嘅社交圈子，都住埋一齐啦。」他解释，曾于Julie身上得到前所未有嘅感觉，直觉是已故「老母」派来照顾他：「有佢包家乡饺子畀我食，感觉唔错呀。」

两人于3年前曾筹备婚事。

顺顺指Julie有已故妈咪的影子。

顺顺跟Julie在43年前嘅歌唱比赛认识。

Julie曾以女友身份跟顺顺做无綫节目《日日妈妈声》嘉宾。

两人拍拖期间会同圈内朋友共聚。

顺顺申诉大会

可惜热恋过后，顺顺嫌Julie罗嗦控制欲强，收楼搞装修又奄尖声闷，似「老母」多过似老婆，诸多投诉令两人关系生变，顺顺满肚郁结，越数越多：「佢之前因为搞间屋装修瘦咗好多，由航空母舰变咗军舰；最惨我又唔系成日去蒲，但佢乜都要知、乜都要查、乜都要管、乜都要睇，有少少唔钟意就追住问『边个嚟㗎？』越相处得耐，越发觉唔系想像中有咁多空间，我单身寡佬几十年自由自在，都几怕呢样嘢。」顺顺坦言当正女方系『老母』，「即系精神、灵魂伴侣，学家燕姐(薛家燕)话斋，我哋呢啲年纪只系搵个互相依靠嘅老伴，同『老母』一齐有住家饭食，只系交代，唔返嚟食饭就得…」语毕，顺顺再笑住踩多两句：「不过，佢包唔返我『老母』嘅饺子味道，而且佢比我『老母』粗心大意。」

鲁振顺𠱁得「老母」Julie好开心。

顺顺偷影「老母」揽狗搞笑生活照。

Julie不时包饺子畀顺顺食。

去年情人节Julie发表爱的宣言。

顺顺有好味住家饭食。

Julie曾在社交网开直播。

家燕姐都有灵魂伴侣。

关系更胜从前

Julie跟顺顺协议变「母子」，关系更胜从前，他搞笑说：「所谓夫妻如衣服，我反而答应负责帮『老母』生养死葬，唔签纸反而唔会有束缚，好彩因为疫情将婚期煞停，大家年纪都大啦，佢明年60岁，死时再加3岁就变63喇，唔好搞咁多嘢。」顺顺指Julie跟他一样父母已离世，所以佢好渴望有家庭生活：「将心比心会𠱁得佢开开心心过每一日，不时带啲欢乐畀佢；屋企布置到有家的感觉，又会夹期一齐去旅行，共同话题离不开3个小朋友(爱犬)。我仲会畀家用『老母』，饮宴时会包走啲食物畀佢，只系大家关系唔同咗，大家各有交友自由，如果佢搵到个比我更好嘅咪好罗，我仲多个『老窦』，有多个照应更好。当大家都有顶颈时候，咪各自返房。」顺顺更强调：「𠵱家健康最重要，珍惜及感恩每一天有得食有得住，过啲简简单单嘅生活已足够，唔好畀咁大压力自己。」

鲁振顺、Julie会互相照顾。

平日顺顺有自己嘅生活圈子。

一把年纪最紧要健康及开心。

「登六」冇性生活

顺顺坦言已同「老母」分房瞓，其中一个原因系年纪大咗，分房瞓会卫生啲，他解释：「男人年纪大经常要去厕所，大家作息及习惯都唔同，无谓影响到老伴，而且两人嘅鼻鼾声都大。」顺顺又自爆『登六』后唔使有性生活，他更抵死说：「我哋神交就得喇！哈…真㗎，唔使搞咁多喎。」追问Julie变身「老母」前，两人曾否有过情侣间的亲热行为？顺顺鬼马回应：「冇就呃你啦，否则点知佢鼻鼾声大？」活在当下的他又风骚高唱周聪嘅经典歌《快乐伴侣》：「寻伴侣大众欢乐趣，求淑女爱她痴心最，日日快乐唱随，做一对好佳侣...」