罗子溢隔空狂冧杨茜尧：我唔识浪漫但会白头到老 陈自瑶拍《婚后事》有感而发论男人出轨丨独家
2024-03-15 07:00 
罗子溢和陈自瑶（Yoyo）在《婚后事》再演夫妻，因为剧集够爆画面够踩界而被网民追捧，两人均大赞对手好剧本好，才有好成绩，特别是入行19年的子溢，得到「私人视后评审员」老婆杨茜尧肯定：「今年有机！」，更首次听到有望冲击「视帝」的赞赏，佢笑言当自己攞咗，非常好笑。而同样获赞的Yoyo，再三澄清并非本色演出，疯狂嗌「离婚」纯剧情需要。两人更大谈婚姻及出轨论，子溢隔空狂冧老婆，又甜又好笑，真系恭喜晒罗太。采访：杜杜 摄影：Stanley 发型:JanChiu@IL Colpo 化妆:Evelyn Ho 服装:@Sandro
子溢和Yoyo相隔13年再合作《婚后事》，两人大赞对方成熟不少，默契更胜从前。首任女一的Yoyo，压力好大，庆幸拍档是子溢，「第1次做咁重要角色，情绪波动好大，好难演绎，唔知人哋觉得你得唔得？播出之前好紧张。」而拍了10几年剧的子溢，觉得角色好有发挥而特别珍惜。
子溢唔敢同老婆睇亲热戏
剧集播出后反应极佳，内地观众亦给予高度评价，两人都好开心。Yoyo觉得最感动是引起观众共鸣，「话『你演活咗好多女性心声』，有啲写埋长文讲亲身经历畀我听，睇到好感动又心痛。」而子溢的信心除来自观众，还有他的「私人视后评审员」杨茜尧，不过亲热戏就唔敢跟太太一齐睇，「我比较胆小，哈哈！第1集有啲赞赏声音，我就话『老婆你不如望一望，觉得有咩改，或者好唔好，客观啲话畀我听』。」结果太太睇了半part已有结论，「老婆」Yoyo嫌他讲得唔清楚，索性罗太上身代为转述，「做得好好呀，得㗎嘞，今年有机！哈哈！」子溢笑得劲冧：「佢话今年有机，我话多谢视后多谢视后，哈哈！」
子溢坦认一向好重视太太的评价，得对方肯定就好有信心，「周围问人『有冇睇套剧？』」对于有否信心冲击视帝？子溢就不强求，「梗系想啦！坦白，唔系清高，都系随缘啦！」入行19年首次获得大量赞赏，令他好有成就感，「有人话『佢食咗咩药，突飞猛进』；『呢个可能系罗子溢代表作』，令人好开心嘅留言，咁多年未睇过留言有『视帝』出现，我以为自己攞咗嘞，哈哈！」Yoyo同样认为有口碑较夺视后宝座更直接，「好多留言支持、鼓励同赞赏，话我做得好好，『视后级演技、等你攞视后』，要得到观众认同好困难，得到已经好开心。」
Yoyo强调跟剧本咆哮演绎
子溢表示首日开工拍法庭戏，状况比想像好，觉得「好老黎」，更认为当父亲后亦有助投入角色，「做咗爸爸，睇对白个心已好痛，幻想真系拎走我个女，真系心如刀割，但又要放弃。演得咁真，因为动咗真情！」Yoyo笑指当日要奋力应接子溢视帝级演技，「嗰日我嘅状态系差啲，都尽咗力，唔系点接到佢啲戏呀，哈哈！」跟老公王浩信屡传婚变的Yoyo，指老公因开工冇时间欣赏其精湛演出，并澄清演得投入并非亲身经历，「成日问我系咪本色演绎呀？又或者系咪同真嘅一样？其实我真系忠于剧本去演绎咋！剧本点写我点演。」她又以疯狂嗌「离婚」获赞一幕作例子，「嗰场系咆哮唔系尖叫，使唔使咁激烈呀？！剧本真系咁写，我忠于原著3句『我要离婚』，后面括住『咆哮』，真系尽力去呈现，最真实嘅『张明芯』。」
子溢妙答精神及肉体出轨
剧中经常提到的精神及肉体出轨，问到那种最不可原谅？Yoyo认为要睇情况和程度决定，「有时男人见到个靓女倾多两句，会有嗰吓思想上出轨，但系佢识唔识好快咁收返？要知道界线，识得收，如果纯粹同靓女倾吓偈，有一刻谂吓，人之常情，好多人都会接受到，但当你真系爱上嗰个人，甚至肉体都出埋轨嘅话，就接受唔到。」子溢就直言精神和肉体出轨同样出事，「最紧要唔好畀人知，畀人知两样都大镬，哈哈！」Yoyo强调感情唔系睇钱，「要睇到你对佢嘅爱，你有冇心，处女座都几讲心唔讲金。」跟太太同样是处女座的子溢，相当认同。他追求细水长流，平淡过一辈子的婚姻，「我非常唔识制造浪漫，或者搞仪式感，但我相信最后会白头到老，临离开人世仲可以拖住嗰个女人，呢个先叫做爱情，爱情唔系一刻，系成段人生。」Yoyo大赞好浪漫，但他笑言杨茜尧另有想法，「我老婆贪心啲，又要你咁谂，又要仪式感，slogan嚟，哈哈！」他更自爆去年跟太太结婚7周年，太太有要求，「佢好单刀直入『7年之痒喎，有咩搞作』，我相信处女座嘅女人，唔系要你付出啲乜嘢，睇到心思同埋着紧佢就够。」
《星岛申诉王》已推出全新项目「区区有申诉」，并增设「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰ https://bit.ly/3uJ3yyF
想睇更多精彩内容，请立即浏览「区区有申诉」活动专页，https://bit.ly/41hgS9E
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应