肥仔狂呻有MIRROR难出头：ERROR好悲哀 跳唱路难行心痛《Lady Killa》成绩麻麻丨独家
2024-04-10 07:00 
34岁肥仔（梁业）＠ERROR出新歌《Homework》，久遗的单人专访，非常Talk得，讲新歌以情侣相处由期待变例行公事，更自爆冧女最落力的一次。提到处男Solo《Lady Killa》落足心机，但成绩不似预期，心情相当灰，又直指有MIRROR一日都难有出头天，更以悲哀形容ERROR。对于《造星V》师弟KC & Tsoul将跳舞明星挂口边，他寄语两人够红就乜都得，「行出街疴屎都有人睇！」采访：杜杜 摄影：孔子 发型:Harris Lai@CHIC Private I salon 化妆:Cori Wong@Annie G. Chan Makeup Centre 场地:Studio Nae@studio_nae
肥仔新歌讲男女关系，拍拖耐了就会变「交功课mode」，不过他强调并非亲身经历，「我都系听朋友讲咋，唔开得名，哈哈！」肥仔透露阿DEE（何启华）有份度歌曲主题，然后秒速澄清，「唔系话阿DEE『交功课』呀，头先讲个朋友唔系讲紧佢呀！」但为保形象，主题有所修改，「本身向曳嘅方向，讲男女夜间活动，但我形象唔可以太曳，『交功课』几好，冇乜人写过。」
节日冧女真心难搞
提到何谓「交功课」，肥仔即嚟小剧场示范，「女朋友打电话嚟，可能做紧嘢，或者同friend食紧饭吹水，咦！打嚟喎！『喂BB』哈哈！」不过他再三强调都是听朋友讲，还称真正挑战是节日，「电话呢啲系最低坛数，最高坛数一定系生日、情人节、圣诞节嗰啲，要买礼物嘛！当好忙买唔到礼物，或者唔记得买蛋糕，求其买个蛋糕仔，会畀人省到晕低。」问到拍拖以来最靓「功课」，他肯定是第1次，「带佢去海港城，呃佢话带佢上邮轮，跟住佢话乜都冇带喎！其实系带佢去附近啲餐厅啫！准备晒蛋糕、花、公仔、礼物，最有心机啦！第2次就唔搞咁多嘢！又唔系hea，大家都觉得可以简单啲，哈哈！」
ERROR团综保人气
肥仔又将「交功课」套用到工作上，会视老板如情人看待，一样要𠱁，所以他不时会打电话向花姐请安，「间中对佢『交功课』，唔系边有资源呀？！哈哈！老细要𠱁㗎！」作为艺人，作品就是功课，他自觉做得最好是首个Solo《Lady Killa》，「第1次永远想做到最好，天马行空，所有嘢放到最大，budget系最贵，但系最终noise冇咁好，唔成正比。」他称不是对自己失望，只是失落找不到原因，「作品冇问题，但流量密码喺边度呢？嗰时仲特登减肥，跳唱条路系难行，咪慢慢行罗！」他认为人气绝对影响作品成绩，唯有另谋出路，「focus喺ERROR团综先，节目令我哋有最大回响同最高人气，真心ERROR嘅歌冇呢个人气，我哋就冇人听㗎嘞，系好悲哀，有MIRROR喺度，我哋就系悲哀嗰个嚟，哈哈！」
望成立跳舞人协会
肥仔出道时开口恨上MAMA舞台，他笑指MAMA近年已不在港举行，梦想越来越远，「香港搞先有机会上去，去到日本点上去呀大佬，哈哈！」他坦认好肤浅，觉得有奖才算靓成绩表，「组合金奖呢几年暂时都唔会攞到啦，有MIRROR喺度！」他真心希望可设立跳唱歌手奖，可能会有点赢面，不过他谂清楚就灰心，「分设多个奖项系啱数，咁就有得争，不过讲投票，唉！都系冇得争。」虽然好灰，但肥仔仍有抱负，「有一日做到古天乐个位，整个跳舞人协会！」
问到KC & Tsuol以跳舞明星方向出道，肥仔觉得路难行，「唔系好多跳舞界冲得出香港，以artist身份冲系咪咁易冲呢？！大众睇跳舞，同我哋跳舞人睇跳舞好唔同，佢哋要睇到娱乐性，冇得界定点为之劲。」他以网上现况说明，「真正嘅dancer同专拍片嘅dancer流量唔同，永远commercial流量多啲，冇咁commercial跳啲underground劲嗰啲，又冇咁多人睇，所以好难界定。」他又以入行5年的领悟寄语师弟，「希望佢哋学识一样嘢，够红，掉咩出嚟都有人睇，行出街疴屎都有人睇！」
《星岛申诉王》推出全新项目「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF
想睇更多精彩内容，请立即浏览「区区有申诉」活动专页，https://bit.ly/41hgS9E
《星岛头条》新网站有更多精彩内容：http://www.stheadline.com/
最新回应