郑则仕向苦主讲Sorry：搵机会闹返我片场火爆王闹人无数名册厚过字典丨独家

2024-05-31 07:00

73岁郑则仕(Kent哥)相隔5年重返TVB拍《神耆小子》，大赞拍剧过程前所未有咁开心。拍过唔少经典作品，演戏半世纪的Kent哥承认后生时意气风发，更经常在片场闹人，被闹圈中人名册成本字典咁厚，他坦言对出口之言绝不后悔，但愿意对闹过嘅人讲句Sorry。记者翻查资料，2021年江美仪受访时自爆1997年首拍ATV剧《肥猫正传》时，曾被Kent哥用粗口狠劲问候，句Sorry唔知包唔包埋畀江美仪呢？采访：方骞平摄影：邓国良场地：南华会甘棠烧鹅

73岁的郑则仕睇到好化，觉得面对现实先系生存之道。

Kent哥重提闹人旧史。

他强调自己唔记仇。

Kent哥同老婆报告行踪。

两公婆透明度好大。

Kent哥最爱打保龄。

「老戏骨」郑则仕于《神》剧为新人冼靖峰及罗毓仪助攻，更发挥精湛演技，上演疑似被樊亦敏「派帽」时，在短短一分钟戏就有多层次的演法，获赞演技好厉害。Kent哥承认今次拍剧非常enjoy，「演出前齐晒剧本，又搵到青春活力嘅冼靖峰『换血』，好少见到咁肯听人讲嘢、领略高、有天份嘅新人；仲有萧正楠、曹永廉、樊亦敏、陈荣峻、鲁振顺，佢哋有能力、有层次、有功底；罗毓仪都好得意，佢将个人性格代入角色中。」

拍TVB剧集《神耆小子》同演员好夹得埋。

Kent哥大赞新人冼靖峰领悟力高。

樊亦敏爆Kent哥如马评家，每晚点评演员演技。

Kent哥在一分钟戏就有多层次的演法。

下一秒系咁。

Kent哥赞罗毓仪好得意，将个人性格代入角色中。

5年前跟邵美琪拍过《街坊财爷》。

自嘲落后睇得好化

卢宛茵(Madam)曾被后辈大胆教演戏，Kent哥就未试过，笑说：「我都希望有呀！」Kent哥更自嘲系落后的后辈，嗰啲系前浪嚟(前卫年青人)：「佢哋唔使尊重我，因为人与人相交冇先同后，冇高同低。讲真Madam最后系咪冇听先？人哋讲两句咪由得佢罗，讲完都系做返自己啫。」他强调𠵱家睇得好化：「面对现实先系生存之道，违背生态圈，只会生存能力不足，要投入落去，可能有9句错1句啱呢？唔使咁负面。」

Kent哥未试过似卢宛茵咁，曾被后辈大胆教演戏。

Kent哥会自得其乐。

Kent哥扮乜都神似。

Kent哥越来越玩得。

好搞马。

Kent哥明白生存之道。

制作人要承担责任

江美仪曾于访问大爆陈年旧事，称27年前拍ATV处女剧《肥猫正传》做女一时，被Kent哥用粗口狂闹，更句句夹杂性器官，当年深受伤害！自称睇得好化的Kent哥坦承后生时血气方刚，会意气风发啲火爆啲，直言俾佢闹过嘅人太多，足足有成本字典咁厚。事隔多年，Kent哥觉得要搞清楚，做演员好简单，唔会闹人，但只要孭上监制、导演、制作身分就唔同，完全系第2个状态：「拍得唔好、唔啱会over budget要负上责任，而且做嘢有规矩，要有尊重尺度，冇就要用粗口闹你，做乜要尊重你？同埋要谂多层，畀钱写剧本系要拍好你，唔系拍衰你，全心为你好。以往畀我闹过嘅人太多，唔顺气，我同你讲返声『sorry对唔住』；人哋呻，会尊重佢嘅选择，但要问心『有果必有因』，闹你只系结果，希望讲埋个因出嚟，咁有冇话畀人听点解要闹你呀？要搞清楚先！」

27年前，鲍起静及当年新人江美仪演以他为内容的剧集《肥猫正传》。

江美仪好记得曾被郑则仕用粗口丧闹，但依然参与恩师聚会。

当年同江美仪都多对手戏。

周润发及郑文雅曾参与Kent哥自编自导自演的电影《何必有我？》。

《何必有我？》续集《肥猫流浪记》由Kent哥监制及主演，张曼玉做女主角。

《肥猫流浪记》Kent哥有唔少经典场口。

当年张曼玉已系当红女一。

Kent哥执导的《狱中龙》，有刘德华拍住湿身透视上阵的新人黎姿。

刘德华、黎姿有嘴咀戏。

1989年《潇洒先生》由Kent哥执导，跟关之琳有唔少对手戏。

1994年郑伊健及锺丽缇拍《人如传说》。

当年金城武在《人如传说》中做男电。

1987年有张曼玉、罗明珠及吕方合作嘅《心跳一百》。

Kent哥1986年执导电影有袁洁莹、黎姿演出的《飞跃羚羊》。

1994年有李嘉欣及马景涛主演的《海角危情》。

李嘉欣系大美人。

1990年刘德华、谭咏麟、林俊贤主演嘅《富贵兵团》都系Kent哥执导。

片中梅艳芳演护士。

幽默回应频传死讯

Kent哥对于闹人旧史有感而发，希望公平啲，更语带相关：「俾我闹过嘅可以记恨，搵机会闹返我唔紧要，不过，好大细超啫，我闹你系几十年前嘅事，𠵱家仲闹紧你嗰啲，你就『阿爷』、『大哥』咁叫，仲赞佢哋好严谨、好认真…妖！」问到闹得最劲系边个？Kent哥自言唔系一个记仇嘅人，可能10分钟就忘记，而且对出口之言唔会后悔，「人哋唔提我都唔记得，自己入行时日日都俾导演由朝闹到晚，我唔错，佢边有得闹？错咪改返好罗，所以反而要多谢佢，我宗旨系对事不对人。」问到近年多次传出死讯，Kent哥对于假新闻答得幽默：「冇所谓啦，系死咗喇，耶稣都可以复活啦！点解我唔可以？唔好中计，唔好回应啲搞乱你嘅假新闻。我反而好嬲疫情期间冇戏拍、冇钱搵；以前纯搵食，𠵱家仲未死又恨做，趁有市场能力为自己『跑山』。」