陈淑兰抱歉掴情敌旧史出土：方中信心胸好广阔 为男人反面20年感激陈淽菁冇嬲佢丨独家
2024-06-04 07:00 
同样54岁的陈淑兰和陈淽菁因误会超过20年冇联络，早前破冰更首度合作主持港台节目《她•他•它》，探讨如何面对生活难题。两人表示重拾友谊会更加珍惜，又公开对爱情睇法和保持青春的秘诀。对于早前接受网台访问，令陈年掌掴情敌莫可欣事件翻hit，兰子就觉得非常抱歉，更大赞旧爱方中信夫妇心胸广阔，「多谢包容我」。采访：杜杜 摄影：Stanley
兰子和淽菁认为目前才是合作好时机，兰子笑言：「相信九运真系旺中女嘅，太早合作，智慧未去到。」她又解释由《开心日报》朝早10点转到《她•他•它》夜晚10点，全因社会有好多负面情绪，她认为要陪伴听众分享心事，「正如妈咪当年有脑退化，我有姐姐（家佣），唔使24小时畀晒妈咪，但依然觉得好辛苦，知道有同行者互相交流，会觉得好有力量，希望可以帮人打气。」
互称「陈总」「陈秘书」
淽菁笑言两人合作未够1个月，已确立兰子为「陈总」，她是「陈秘书」的关系，兰子自爆：「黎瑞恩问我，你同淽菁做嘢佢会唔会嬲你？我话嬲咩呀？佢话你咁懒唔做嘢，我话淽菁话畀我听，佢最锺意做嘢，咁就一拍即合。」兰子坦言乜都靠晒「陈秘书」，「淽菁话有啲资料搜集，我话你唔使话畀我知，我系你个影，我跟住你行得㗎嘞！」两人超过20年没联络，不过兰子跟淽菁身边人反而有接触，「佢老公系一流律师，喺佢口中知佢老婆好大方冇嬲过我。」兰子怪自己误信小人谗言，在饭局中主动跟淽菁道歉冰释误会「我比较天真烂漫，到𠵱家都系老天真。」讲到当日为男人而产生误会，淽菁说，「我老公系佢介绍，佢都误会，我唔锺意解释，知佢受人影响。都好多谢佢，我喺娱乐圈都唔系俾人虾得少，但佢系唯一一个会锡返我嘅人，会好珍惜呢个朋友。」
努力同地心吸力搏斗
两女同样1969年7月出世，虽然快将55岁，但keep得唔错，淽菁答得搞笑：「可能我细个个样已经好老，五官唔系特别靓，我座右铭系，唔系最靓嘅少女，但一定要做最靓嘅婆婆，坚持勤力做运动，食嘢好小心，日日做面部按摩、面膜，刮痧，仲有唔同嘅美容家用机，努力同地心吸力搏斗，我做到你都做到，反而兰子就真系天生丽质。」兰子即否认，「大家都知我做医学美容出过事，呃唔到人有证有据。」兰子大方承认有keep住打美容针，并笑言：「都系为咗节目，我不入地狱谁入地狱？！」她又认为心情开朗是保持年青最好方法。
跟大律师丈夫张锦荣结婚21年，女儿珈玮（Antonia）亦已20岁，在加拿大修读生命科学，淽菁好珍惜老公，「感情好难一路保鲜，要提醒自己初心，除咗系我先生，亦系我好亲嘅亲人，一定要谂啲活动大家一齐做，咁会行得再耐啲。」而她跟女儿关系如好朋友，「否则好多嘢唔会同你讲。」 她透露女儿第1次见兰子已经话：「I like her，觉得佢好开心。」冇仔女的兰子赞Antonia好乖，好想上契。
兰子择偶唔要小鲜肉
兰子笑言会积极搵多啲契仔契女，「等时老咗，等佢哋推我出去晒太阳。」问到是否已放弃拍拖？淽菁即爆她多人追，兰子玩搞笑：「可以骗我色，但唔可以骗我财，哈哈！」谈到择偶条件，「相处舒服罗！我唔锺意小鲜肉，最多细1、2年，我注重内涵。」兰子认真表示很享受单身，最重要有好多爱锡她的朋友，「好多人同我讲，好可惜喎你单身，望吓我生活先，我惊你妒忌，𠵱家过时过节，一早有5家人约我年夜饭，假设我搵到老公，分分钟遇到问题，老公唔帮我处理，𠵱家有事唔使开声，大家已经帮我处理，好多人照顾同关心我。」
至于早前接受网台访问，令当年掌掴莫可欣事件翻hit，兰子即解释：「我想搞气氛系讲笑，未必系讲紧嗰件事，第1次上呢啲直播节目，留言有佢（莫可欣）个名，我由头到尾冇讲过任何人嘅名，有听节目嘅人就知。我唔想伤害人，莫小姐系好大方嘅人，有次首映，我同佢打招呼，佢都好好，我哋冇嘢㗎！」她承认后生时处事冲动，「我冲动嘅伤害性几大，莫小姐、方先生（方中信）都好包容我，好彩遇到心胸广阔嘅人，佢哋知我唔系有心。」
《星岛申诉王》推出全新项目「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF
想睇更多精彩内容，请立即浏览「区区有申诉」活动专页，https://bit.ly/41hgS9E
《星岛头条》新网站有更多精彩内容：http://www.stheadline.com/
最新回应