45岁卓韵芝任揭伤口深度谈前夫 94岁婆婆高坛数食住花生睇孙女离婚丨独家

2024-06-12 07:00

45岁卓韵芝（阿芝）因一次冰岛险死之旅，突然叮一声，决定相隔5年再开骚《芝姐灾难大全》，同观众分享人生及婚姻观。对于前年跟结婚4年的美术指导梁子贤离婚，阿芝唔怕揭开伤口，公开离婚原因跟相处太客气有关，至于乖孙婚姻失败，阿芝笑言相依为命多年的94岁婆婆零伤感，更联同印佣一齐食花生取笑佢，相当好笑。采访：杜杜摄影：Stanley 发型:Marvin@shhh_group 场地:Little Tai Hang@littletaihang

阿芝透过公关表明「欢迎问Show以外嘅嘢」，访问期间的确有问必答，大方态度好抵赞。

阿芝再开骚是因为想赚钱又想威，同时展露自己的初心。《芝姐》以她年前一次冰岛之旅作主线，「每样计划都唔同晒，系骨牌式失败嘅旅程，talk show越悲哀系越好笑，睇见他人受难实在系太好嘅娱乐嘞！」阿芝跟朋友自驾游冰岛，发生了跟死亡很接近的交通意外，令她认真反思人生及审视自己婚姻，「依家都巿人都有90岁，我𠵱家岁数（45岁）真系啱啱好鎅开一半，我谂下半生应该点样过？！」

阿芝7月举行全新独脚戏《芝姐灾难大全》。

阿芝爱去旅行，闪婚前已跟梁子贤去地中海玩。

煲咗汤仍然预埋前夫

2018年的《呃呃氹氹One Night Stand》，当时阿芝跟梁子贤新婚，对方还甜蜜撑场，但原来两人相处一直有道永远跨不过的墙，「我哋系好有礼貌嘅人，好客气，朋友都话『其实你一直都系叫佢丈夫先生，即系Mr. Husband，点解感觉咁唔亲昵嘅？！』我话唔知，我哋返到屋企都系好客气。」她想到唯一原因跟原生家庭有关，「我爸爸妈妈离婚时好唔开心，变咗自己都会步步为营，唔可以太过自把自为，讲嘢要小心，反而同朋友就直接讲，可能特别想保护呢个关系，结果就好客气，两个人好难直接咁开口讲嘢，有倾偈都系啲日常生活嘅嘢，而唔系内心嘅揭示。」

2018年阿芝举行《呃呃氹氹One Night Stand》，当时新婚老公梁子贤亦有撑场。

阿芝庆幸跟前夫关系较单纯，能够和平分手，「我哋冇小朋友相对自由，又冇共同生意，厘清相对容易亦少啲拗撬，我哋都好守护一样嘢，就系点都好，大家一定要好嚟好去。」阿芝跟前夫已变了家人关系，「煲咗啲咩汤，会问佢『你得唔得闲过嚟攞壶汤』。」分开后两人相处依然客气，「可能客气咗个头，同埋佢真系好好人，个人好善良，唔系一个讲嘢好尽嘅人，对住一个咁嘅朋友，我亦都唔会好尽。」现在单身的她并不急于拍拖，亦继续相信婚姻，「有就拍罗！𠵱家冇呀，我系咪要玩吓交友app，哈哈！如果有人要我或者喜欢我，都会努力尝试，卓韵芝都系个勇往直前嘅人，所学嘅嘢唔会白费，就算有冇下段恋爱或者婚姻，我都学习咗做一个更加坦诚嘅人。」

2018年，阿芝跟美术指导梁子贤举行婚礼。

阿芝公开跟梁子贤拍拖时，难得公开合照放闪。

受婆婆人生哲学影响

阿芝称94岁婆婆得知她离婚，没有预期伤感，反而抱著食花生心情，境界相当高，「嗰日鼓起勇气食饭同佢讲，食到尾声先讲怕佢食唔落嘢，点知我一讲佢就笑我嘞，佢话『你自己拣啦，哈哈，傻㗎你』，佢觉得自由恋爱年代，拣呢个人又系你自己拣，分开都系自己拣，侧边嗰个人可以做嘅就系取笑你罗！过几日谂住佢会忘记，点知睇电视睇到日本食和牛，佢突然话『芝芝呀，我不如陪你去呢度散心』，佢谂住『公器私用』，真系个好可耻嘅人嚟，哈哈！」最搞笑连印尼籍家佣LuLu亦笑埋阿芝一份，「佢成日同阿婆连线，佢哋劲friend，有日电视播紧峇里嘅画面，我话『LuLu你家乡，呢度劲靓，劲多人喺嗰度影结婚相』，佢就话『你呀！下次啦』，阿婆喺度偷笑，点样呀？！呢个家冇人安慰我，净系耻笑我。」

阿芝跟婆婆多年来相依为命，感情极好。

婆婆开心见证阿芝跟梁子贤结婚。

婆婆睇得开，阿芝认为跟她经历有关，「佢经历过二战、她妈妈小产、爸爸戒鸦片死、老公喺佢后生时死咗，亦都死咗个女即系我妈咪，佢经历过极多创伤，但好犀利，经历咁多创伤，到最后仍然保存一种透明感，唔会悲天悯人，佢系我偶像，无论经历过咩，最后都好有空气感做人，所有嘢都好轻巧。」阿婆的人生哲学亦有影响了她，「佢同我系极端相反，我好多嘢谂好多思考，佢系乜嘢都唔思考，𠵱家都系左右唔识分，有次喺楼下见到杨天命，佢话你阿婆已经成咗仙，真系将憾事放低晒，冇咁多包袱，往事发生咗就发生咗，唔会当包袱咁去孭。」