曾国祥承认王敏奕加入TVB有压力：同佢做心理辅导超强抱负提拔年轻电影人带港剧登串流平台丨独家

2024-06-19 07:00

曾国祥（Derek）成功冲出国际为 Netflix科幻剧《三体》担任联合导演，因为串流平台渗透力强，他认为较电影更能提升知名度，所以未来会多制作本土剧，希望能将港剧带上串流平台，令到香港电影电视人可以多条路发展，非常有抱负。不过，满肚计划的他冇打算跟老窦曾志伟揸旗的TVB合作。至于老婆接连拍剧都有非常厉害的亲热戏，曾导演完全唔介意，抛下一句，「我都做过演员。」答得好潇洒。采访：杜杜摄影：朱伟彦场地:ULURU

Derek认为香港有很多本土特色的题材，可作为剧集素材。

Derek开心成为第二届「Eye Catcher Global」（ECG）大使，并担任竞赛评审，「好想帮到年青人讲故事，我都经历过𡃁仔时好想拍片，帮到尽量帮。年青人讲故事个欲望同初衷好紧要，唔好俾太多技术嘅嘢规限，原意最珍贵，入咗行呢样嘢会慢慢磨灭。」由参赛者变评审，他笑言生理变化多于心理，「因为老咗好多。」年届44的他自问初心不变，「睇到锺意嘅电影、书，仲系有好兴奋感觉，欲望仲喺度，心态冇太大变化。」他还用其他方式帮助年轻电影人，最近就为内地导演的新作配音，「佢想搵个有广东腔嘅人去配段普通话对白，之前喺影展认识，俾佢热诚打动，我冇睇个故事就应承做，我经历过搵人帮手，配音系举手之劳啫！」就算新导演邀合作，一样乐意，「有搵新导演倾新project，个故事双方都有感觉先一齐做。」

Derek出任第二届「Eye Catcher Global」大使，并担任竞赛评审。

靠《少年的你》冲出国际

Derek出任Netflix科幻剧《三体》其中两集的导演，他认为能冲出国际，代表香港角逐第93届奥斯卡最佳国际影片的《少年的你》帮助最大，「去咗好多影展，又有啲奖，多咗好多国家嘅人觉得呢个导演可以倾吓偈，先有《三体》嘅机会。」他认为亚洲题材抬头，要好好把握，「呢几年见到好多好成功嘅亚洲题材戏及剧，有呢啲例子，越嚟越多外国公司想做啲好东方或亚洲故事，多咗好多机会，需要亚洲电影人去执行呢啲故仔。」他认为成长背景，对事业发展有一定帮助，「我觉得自己有少少边缘，喺香港土生土长，11岁移民加拿大就系二等公民，读完书返香港，好多人觉得我系CBC，又有少少边缘，喺香港做电影再到内地工作，又觉得我系香港导演，依家到美国做嘢，哈哈！人哋又觉得你系中国导演，但keep住嗰种边缘化，畀到角度同perspective我去创作。」

Derek凭2019年执导的《少年的你》奠定业界地位。

Derek凭《少年的你》夺得「香港电影评论学会」最佳导演。

在加拿大长大的Derek，认为有助扩濶视野。

制作本土剧吸引外国人睇

Derek最新电影计划是改篇美藉华人女作家的小说，预计今年秋天在美国开拍，对于再次改篇小说，他搞笑解释：「懒罗！由零开发好费时。每次都系咁啱遇到好锺意嘅小说，好想去做。」至于何时看到他的港产作品，他表示开发故事中，「希望做到香港本土故事，但世界各地嘅人都会有兴趣睇。」不过他放眼并非电影巿场，「希望香港本土剧，去到国际平台，其实唔止我，好多导演、老板都努力紧，觉得可以做到啲剧，出到出面，又有多条路。」他认同网上平台的渗透力比电影更高，「揿个制睇到，我拍完《三体》，喺香港、台湾或者内地，唔识我嘅人话好锺意个剧，之前拍戏都未试过有人无端端话睇过我部戏。」提到爸爸曾志伟主理的TVB，亦有网上平台myTV SUPER，他就未想合作，「暂时想同啲国际平台合作，冇谂过同本地电视台合作住。」

Derek为 Netflix科幻剧《三体》出任联合导演。

Derek暂不考虑跟爸爸曾志伟主理的TVB合作。

Derek很想尝试执导动作片，「睇动作片长大。」

两公婆工作上会互畀意见

讲到王敏奕的新朵「最美小三」，Derek认为反映了太太有好成绩，「佢系好好嘅演员，睇到佢有好嘅剧，好嘅角色，无论咩朵都好，都系一个认可，好戥佢开心！」而太太连续在《婚后事》和《家族乐耀之继承者》有大量亲热戏，他完全不介意，「我都做过演员，演员工作有呢啲戏就冇办法。」至于会否夫妻档合作？「工作同生活唔好沟埋一齐，件事会好复杂，我同佢有共识。佢收到剧本会同我倾，我会畀意见，我嘅剧本佢又会畀意见。」他承认王敏奕加入TVB后有压力，亦有为她做心理辅导，「一路同佢讲，做好自己本份大家会睇到，实有好多说话，又会话你靠关系，话我靠老窦都讲咗咁多年，客观嘅人见到你努力做好自己嘅嘢，自然会证明到自己，尽量唔好太在意呢啲说话，我对佢好有信心。」