张凤妮谨记契妈传授对抗「小三」锦囊：冇人揿钟唔好开门分享稳坐大马豪门人妻心得丨独家

2024-06-20 07:00

55岁前港姐张凤妮(凤梨) 1997年下嫁大马富商傅仰峰，相夫凑女息影28年。直至3个宝贝女陆续升上大学才久休复出，拍TVB新剧《家族荣耀之继承者》去打发时间。嫁得好嘅张凤妮虽然唔排除老公会有女人埋身，但27年来豪门少奶奶地位仍稳如泰山，她公开分享被老公及奶奶锡到燶心得：「有啲嘢唔应该知道嘅时候，就要扮聋扮盲扮哑！」采访：方骞平摄影：朱伟彦

55岁张凤妮有妈妈白滑基因，所以保养得宜。

张凤妮有冻龄能力。

稳坐大马豪门人妻27年，作风低调。

多年来她以家庭为重。

张凤妮系贤妻良母。

张凤妮再拍TVB剧集获网民大赞演技大爆发，尤其罗子溢主动认返佢系亲母时，凤梨上演嘅「喜极而泣五连环」表情超正。张凤妮开心被观众认同演技，因为内心挣扎戏唔易演，表面上做到「人畜无害」受人同情，内里系「机心二房」。

含泪演出。

表情多多。

剧中有唔少内心戏。

张凤妮内里系「机心二房」。

演技七情上面。

剧中角色表面上做到「人畜无害」受人同情。

剧中不停扮好人。

原来早已为亲生仔铺好后路。

怕被弹会打烂「斋砵」

她自爆拍完后曾忐忑：「以前喺TVB嗰10年畀人话唔系靓女唔属偶像派，好惊28年后被弹戏屎被打烂实力派『斋砵』。老公话『有信心咪玩吓罗！』支持我复出，却附加一句『如果俾人哋弹做得唔好，唔止会令人失望，你个心都会唔开心…自己谂谂啦。』不过，讲到底老公怕我烦，要佢陪食晏，补充句『𠵱家3小朋友都长大晒，你冇嘢做日日跟我返Office就唔好喇，你都系去玩吓先啦，玩得开心啲，一年一次好啦。』」

《他来自江湖》为了追万梓良，不惜牺牲色相。

当年算系几大胆。

当年张凤妮走实力派路线

张凤妮演出《他来自江湖》唔怕被丑化。

《餐餐有宋家》有黄𨥈莹、古天乐等演出。

张凤妮当年受捧。

1997年跟刘玉翠演完《苗翠花》后离开TVB。

曾跟宣萱、邓兆尊、林伟、黄𨥈莹、卢宛茵等演出《餐餐有宋家》。

大男人主义好难顶

张凤妮做大马豪门人妻27年，她却唔敢话自己系嫁得好：「系我自己睇得开啫，大马嗰边啲人好大男人主义，啱啱嫁过去时，喺外出食饭男一枱；女一枱，初期好唔惯，自然地坐埋去老公度，老公却话『成枱都系男人，唔通得你一个女人咩，我阿妈都系坐隔篱，你我坐返过去奶奶嗰边啦。』有时佢夜晚收工返到屋企，会拍醒我话『好饿，老婆整个面嚟。』咁我咪起身帮佢煮宵夜。其实佢都锡我嘅，只系当地风气问题。」

1997年下嫁细她7岁嘅大马富商傅仰峰。

当年在港摆婚宴。

同届亚军系「电眼美人」李美凤，当年被誉为最高质港姐。

着性感泳衣嘅凤梨系87年港姐「最受佳丽欢迎奖」得主。

张凤妮好有人缘。

得奖实至名归。

谨记扮聋扮盲扮哑

老公有钱有面，问到可会有女埋身？她竟坦言：「任何一个国家，就算有冇钱系咪靓仔，(埋身)女人一定有，睇吓个男人点样handle，有啲忍唔住受诱惑；有啲会自我提醒已有老婆，so far我唔知有冇啦，但我冇听过亦冇发现到啲乜！总之佢返到嚟做到应做嘅嘢，会尊重我，系我要嘅嘢罗。」契妈曾教凤梨稳坐豪门阔太心得：「佢话有时候要扮聋扮盲及扮哑，冇(女)人揿你个钟唔好自己去开门，佢(老公)对你冇嘢，唔系对你唔好，唔系不负责任就OK…有啲嘢唔应该知道嘅时候就唔好知，我跟住做自自然然咁过咗20几年，人哋冇嚟揿我钟咪算罗，不过，如果人哋踩到埋嚟，我又唔会唔还拖。」同时，凤梨相信够做到一位好妈咪，好老婆及好新抱，老公一定会感恩，唔会行差踏错拆散大好家庭：「咁多年我真系落手落脚煮饭㗎；接送仔女返学、参与家长义工会…所以奶奶好锡我，而且我好有分寸，唔会发癫咁买嘢，咁都会买衫及名牌包包嘅，give and take，但冇需要炫耀。」

多年来凤妮悉心照顾老公、长女Emily、次女Ashleigh和细女Ally。

3女已陆续升读大学。

母女关系亲密。

饼印母女。

凤梨每月会返港一次探望家人，乘机和旧同事聚会。

凤梨想家人食得好，亲力亲为下厨。

每周煮足几餐。

她强调，当日唔系抱住嫁个有钱人心态，搵对象要有感情基础：「否则就算日日买3个名牌包包，但每晚要对住枕边嘅人都唔会开心。」至于夫妻关系如同跳舞，大家要有进有退：「初嫁去大马会有公主脾气，老公会忍让我多啲；有咗囡囡后夫妻忍让程度各占一半；到佢40岁，感激对方为头家奔走会让返佢；𠵱家自己更年期脾气好难顶，会热到开大冷气，甚至赶老公出房，仲会有强迫症，老公系会就返我嘅。」