《无声绝境外传：首袭日》世界末日又有咩好惊呀丨头条戏场

《无声绝境》及《无声绝境II》全球票房大收逾6亿美元，成为惊栗悬疑电影的新经典。系列去到第三集，跟前两集一家五口完全冇关系，转为同首集一样时间綫，即外星核突生物入侵地球的第一天，但从另一群在纽约生活的幸存者视角出发。影评一面倒狂插好闷、唔够惊吓，其实本身玩「唔想死咪出声」概念已经唔新鲜，《外传》玩末日情谊，一个癌末女加读Law的惊青男逆着人潮在大城市废墟漫步，最重要末日降临仲可以养猫又可以互相救赎，惊吓度的确唔够前两集多，但非常温暖。(刚上映) 撰文:廖思慧
 

Samira一身文青打扮在废墟放猫，反正都要死，冇所谓啦。

猫猫跟住主人走难，睇到劲紧张。

其实怪物无处不在，唔畀你呢样唔畀你嗰样。

Samira跟Frodo相依为命，猫猫好乖，知道乱出声会冇命。

作为资深猫奴，一睇预告已经知道必须要入场，人类完全控制唔到BB同动物叫喊，续集见证过BB喊声嘅威力，猫叫亦可大可少，估计会吸引大量依靠声音猎食的外星生物埋身，相信全片紧张位亦同猫有关，入场后发现原来谂多咗，人生第一次睇文艺惊悚片，感受非常特别。

全靠女主角好坚强，男主角先有勇气生存落去。

呢幕地下铁逃亡超惊险，套戏点会唔恐怖呀?

两人互相扶持，末日友谊几感动。

连猫都知道唔可以乱出声
全片重要人物，孤独癌末女诗人Samira(Lupita Nyong\'o饰)跟一只猫Frodo住喺灵养院，因为好想食Pizza走进市区，撞正外星生物随陨石跌落地球，好多人死，不断传出爆炸声，人人叫救命，吸音怪物兴奋地享受人肉放题，明明打头阵呢幕就好好睇，玩人体光影灰尘加突然无声，猫猫仲要被巨响吓亲跳走，稍为代入少少，恐惧感已弥漫全身。

纽约市居民听到有逃生船即刻出晒嚟，怪物全部喺附近。

因为怪物怕水，政府为咗杜绝怪物四散，自私地烧桥。

Henri(Djimon Hounsou饰)曾出现《无声II》，当中讲述外星生物入侵时，他在纽约跟市民如何试图乘船撤离。

电影冇一个坏人角色，个个守望相助。最特别惊青男主角Eric(Joseph Quinn饰)中途出场，虽然跟女主角萍水相逢，但末日面前互相支持，齐在暴风雨中大叫，更在黑暗中吟诗，甚至演奏不能发声的乐器，我觉得好浪漫。Samira本来就要死，人人想逃离市区，但佢选择逆着人潮返回已变废墟的出生地，在生命尽头好好跟自己及世界告别，如果世界已变烂，末日又有咩好惊?
 

真系好鬼得意，由开场担心到散场，好惊佢会死。

男主角揽实只猫狂奔上船，你睇后面只嘢几黐线。

男主角因为见到Frodo先跟女主角相遇，好彩世界上有猫。