43岁袁伟豪努力保养期待同囝囝游车河 自认大叔仍不忿网民为流量嘲衰老丨独家
2024-07-23 07:00 
袁伟豪（Ben）在《反黑英雄》首度演杀人如麻大反派「陈祖耀」，他演得过瘾，观众亦睇得投入。不过他的状态再度成话题，他就不忿网民为流量才经常嘲他衰老。他坦认毕竟已年届43岁大叔之龄，加上早年捱坏身子，但已努力保养。升呢人父的他，开心囝囝袁晞佑（乳名：袁咕碌）已识叫「爹爹」，期待等囝囝大点一齐游电单车河，还透露有意追个女。采访：杜杜 摄影：谭志光 场地:Velo Italian Bar & Grill
Ben对于演大反派，完全不抗拒，还形容「陈祖耀」，「呢条友几型，几劲喎！好爱恨分明，有仇必报，亦都好重情义。」他选择以踏实方式演绎，更得到认证，「差唔多拍完监制话『几好睇，有啲嘢喎』，我就觉得呢件事成功咗一半，走啱咗方向，只系观众会点睇，系咪真系会咁肉赤呢？！原来佢吊颈嗰刻啲人都会话『咁点算冇嘢睇喎』，证明大家代入咗，呢个人系有血有肉。」
拿旧作比较好无谓
Ben近期每逢有剧播，外界着眼点不是演绎，反而更留意他的状态，他坦言觉得好无奈，「𤷪梗系会有，点解要咁啫？！成日讲衰唔衰老，又断涯式又旋风式。」他分析外界拿旧作来比较，认为相当无谓，「点解「天堂哥」（《使徒行者2》）会变成咁？！『天堂哥』系7年前㗎啦，唔该！《铁马战车》个『司马sir』 10年前㗎啦！嗰时33岁，今年小弟已经43岁，「牙佬」系34岁，系最fit，最当打嘅时间，人生最健康、能量最高，回气回得最快，最襟捱嘅时候，嗰时仲要高清，𠵱家系睇紧4K、8K，同期我又拍紧两个剧，又做咗人爸爸，个样少不免有啲残，现场环境又恶劣，个妆甩得快啲，咪又见到我更加攰罗！」他又笑言已自称uncle，「成班世侄，都系叫我Uncle Ben，𠵱家我觉得大叔好型，冇贬意！」
Ben强调不会为这些声音，放弃搜寻有关自己工作的消息，更会忍不住出手澄清，「佢想要流量，做啲话题出嚟，唔系啲正常人嘅用户，而我见佢有啲嘢想做，咪回应佢其实我唔系肥，喺我工作生涯裹面，我应该冇肥过，未试过有肚腩。」他最不忿是网民一句话，随时变成新闻，「你话我残都算，仲要话埋我有肚腩，我日日饭都冇得食，就系为咗个角色想fit啲动作打得快，你一句话我有肚腩，我又畀啲传媒讲话我走样有肚腩，咁系咪𤷪先，所以我咪话畀佢听唔系肚腩嚟，系腹肌嚟！」
调整作息努力保养
Ben坦认身体早已捱坏，更笑言每日状况有「最佳食用期」，所以工作前要提早起身去水肿，「今日做6个专访，正午12点开始，我要7点起身就系要等自己醒，碌面，就算碌完都系肿到乜咁，都要碌㗎嘛！咪就系年纪大罗，捱坏咗啲内分泌。」他亦好注意饮食，以少甜少盐为主，「总之少盐系大前题，唔食宵夜，唔食甜，因为糖化衰老得好快，一定要做运动，跑步同埋做gym，但冇之前个强度咁犀利，以前我会跑10K，𠵱家跑5K松啲就收手，惊跑得太多甩水太劲又会攰。」
为了保养兼凑囝囝，Ben更调整了作息时间，「我平均夜晚12点半度就瞓，以前系3、4点都唔瞓，𠵱家唔使开工我都会咁早瞓，尽量7、8点就起身，上午去做运动，晨操完返嚟就去凑BB，陪吓屋企人，夜晚就cut应酬，食饭7点食到10点返屋企，唔会玩到好夜，靠呢啲嚟保养。」
计划为囝囝追个妹
讲到升呢人父，Ben坦认责任大了，连揸快车都会有内疚感，「上年（张）宝儿陀咗 3、4个月，啱啱公布咗有BB，我同振朗去咗欧洲拍《欧洲铁骑游》，我喺德国嗰条冇限速公路揸到200几公里，揸住电单车爽㗎！听见啲引擎声，又有啲风，见到个表180、200、220咁上，完成咗嗰个速度好正，但系之后嗰几秒就觉得好内疚，即刻就谂我嗰吓炒车，我个人就散，BB点呢？！都未见到我，我就唔喺度咁点算呢？！觉得有啲嘢，唔使去到咁尽，年少时试过呢啲嘢就算嘞！」
Ben提到袁咕碌就冧晒，开心透露听到囝囝识叫「爹爹」一刻劲兴奋，更期待等囝囝大点一齐坐电单车，「佢够6岁定7岁坐得，我就会畀佢坐㗎啦！佢有意识掹住我，就会带佢游车河，喺屋企附近兜吓，或者出去石澳同啲uncle饮吓茶，同吴家乐叔叔，李𤨪琛叔叔一齐游吓车河，型呀！」他又计划2、3年后为袁咕碌追个妹妹，「我都系有个妹，佢成长多个人陪伴，起码唔使对住个公仔讲嘢，唔使对住个平板电脑，冇人同佢互动。」
最新回应