专栏│车路士又想逼走自家青训？

今夏车路士继续清走自家青训，再购入有潜质成为明星嘅球员，已经清咗伊恩马迪臣、利维斯贺尔同奥马利赫捷臣，集训初期仲要将杜利奥查洛巴炖冬菇，冇得一齐去美国集训，而家又轮到干拿加历查。

虽然上季加历查表现出色，但球会自1月冬季转会窗已经想将佢清走，原因都系财政要达致收支平衡，亦都为未来买球员作准备。球会其实同佢一路倾紧合约，但系彼此都冇共识，近期传闻嘅一份约系2+1，但系对比安素费南迪斯或摩西斯卡些度等等新签返嚟嘅中场球员全部都系5年约起跳明显太短，所以一路都未落实，前排更加传出马体会打算用4,000万欧罗收购，不过加历查本人一路都未决定转会定系留队，原因好简单，佢爱车路士。

在情在理上，加历查都值得更加好待遇，应该要转会，而马利斯卡嘅回应都系避重就轻，冇就呢件事正面回应。其实以往车路士清走年轻球员都系习以为常，以往嘅穆罕默德沙拿同奇云迪布尼就系例子，有钱就可以卖走，但往往都可以用成绩掩盖。今次加历查系上季队中好重要，甚至最出色嘅球员，今次嘅逼宫连埋查洛巴事件，就显得有少少难睇。

不论加历查最尾留低定走，佢都系好努力同埋爱呢间球会嘅人，真系少之有少，即管睇吓嚟紧发展点，Stay Or Leave？Willhappy