李芯駖童年任睇三级血腥电影：《力王》好深刻 陈湛文李靖筠轮住爆老窦暗黑教育史丨独家
2024-09-19 07:00 
41岁陈湛文（Peter）、31岁李靖筠（Gladys）和38岁李芯駖（Sumling）＠COLLAR在新戏《望月》中是一家人。电影讲述原生家庭对仔女成长的影响，三人坦言现实亦一样， Peter及Sumling就分别因为爸爸嘅严厉及嗜好而培养出创作和艺术天份，而Gladys就被父亲当仔咁养，大个变咗男仔头，采访：杜杜 摄影：朱伟彦 发型:Sing Chan@BRUNEBLONDE(Gladys)；Lisa C.Makeup Art(Peter)；Ricky Lam(Sumling) 化妆:Angel Mok(Gladys)；Lisa C.Makeup Art(Peter)；Janice Wong(Sumling) 服装:Polo Ralph Lauren(Gladys)；eye\'s Buddy、New Balance(Peter)；Peter Do、Prada(Sumling) 造型:Daniel Cheung(Sumling)
Peter和Gladys早于2019年《碎纸机的告白》MV及2022年ViuTV剧《IT狗》合作，在《望月》就演兄妹，份外有默契。而初次拍戏的Sumling便考起饰演「老公」的Peter，「佢好黐线，问我咩叫好演技呀？！哗！大佬点答呀！你试吓问梁朝伟呀？！」Sumling笑谓：「我就系想睇吓你点样答！」Peter鬼马话：「唔制呀，好似捉错处咁！」Peter笑言当时跟Sumling展开漫长的艺术讨论，最终搵戏中演他邻居的演艺师兄弟帮拖，Sumling解释：「关于戏剧，佢会推介唔同嘅老师，嗌我留低睇埋阿卵（杨伟伦）演出。」
搭火车望云激发想像力
三位主角承认现实世界亦深受父亲影响，Peter先分享跟陈爸爸的经历，「细个搭火车去探阿嫲，老窦好锺意途中叫我，望住啲云，谂吓见到啲乜就讲出嚟，系严厉嘅。」Sumling搭嘴：「咪好似罚咁！」Peter亦认同，并表示当时细个只会照做，大了就发觉有好处，「应该系嗰时种咗啲种子落右脑，望住啲云不停咁变唔同形状，会激发少少想像力，我深信阿爸唔想我一嚿饭咁，可能我细个太『摺』。」Gladys问：「你会唔会承传落囡囡？」Peter表示会同囡囡一齐做，「呢嚿云似咩呀！」Sumling赞这个育儿方法不错，被赞的Peter得戚补充：「都要消化到先得，如果我觉得佢（父亲）嗰时咁恶，𠵱家唔锺意啲云啦！」
走廊打侧手翻打到为止
Gladys认为男仔头性格全因为爸爸，「细个啲女仔都系学琴棋书画，但我阿爸好锺意教我踢波，逼我喺走廊打侧手翻，劲窄喎点打呀，佢一定要我打到为止。」Peter原来都有类似经历，「老窦有叫我做一字马！」每年暑假，Gladys爸会安排她入summer camp，「佢想逼我独立，硬净啲，我大大吓开始唔锺意着裙，最锺意超人，可能我好想得到老窦attention，佢唔锺意我玩煮饭仔，锺意我踢波，慢慢偏向锺意嗰啲嘢。」
Beatles黑胶由细听到大
Sumling出身于破碎家庭，母亲曾被父亲家暴要报警求助，不过她认为全靠热爱音乐的李爸爸滋养了她的音乐细胞，「爸爸好锺意听黑胶碟同卡式带，Bee Gees、Beatles嗰啲，《重庆森林》soundtrack都识背，嗰时唔知咩嚟，1日听足10个钟。」而妈妈对她的思想教育亦根深柢固，「妈咪就犀利，由细到大训练我，有咩事都系讲1句说话，就系玉不琢不成器，佢话粒玉唔琢唔得，𠵱家你咪要啄罗！」Peter多口问句：「你会唔会问阿妈，点知你系咪粒玉呀？」Sumling扮妈咪答：「你唔啄就一定唔系罗！由细到大我都知我要啄嘅，你啄我啦！」小时候爸爸除了让Sumling任意画墙，养成她对画画兴趣，还任她接触漫画及儿童不宜的三级电影，「细个好深刻就系《人肉叉烧包》嘅影带，仲有《力王》，哗！点解世上有啲咁嘅戏，剪自己血管出嚟绑个结，又打爆个墙，爸爸又好锺意睇漫画，所以我睇好多漫画，阿妈就完全唔锺意艺术，净系锺意打麻雀，一个好艺术同好理智嘅我就系咁合成。」
最新回应