肥妈通完「波仔」即发火：咁X街男人都有嘅 「中年」评判闻郑梓浩笑孙美贤「搞唔起」贱史 丨独家
2024-09-24 07:00 
《星岛头条》独家披露55岁「中二生软饭王」郑梓浩（Brian）系终极贱男，使前女友Grace钱使足7年，同时搭上内地「小三」，及被孙耀威人母妹妹孙美贤(DaDa)包养。作为「中年好声音」评判的肥妈一听到郑梓浩个名就劲嬲，大声讉责对方贱男行为，更皱晒眉说：「你估你真系会转弯呀！」肥妈对于Brian笑DaDa似阿婆搞佢「唔起」，刚通完「波仔」的肥妈即发火，「咁仆街嘅男人都有嘅？」更力撑DaDa又靓又高贵。采访：方骞平
郑梓浩一脚踏3船偷食风波轰动全城，肥妈觉得TVB应该将「真人真事」拍成剧集，她越讲越激动：「我要访问呢个阿浩点解咁犀利？有咁多女人畀钱佢使，佢系咪咁劲呀？又唔系小鲜肉，可能有人锺意食老叉烧...」一脸疑惑嘅肥妈再说：「我做人咁有经验，真系睇唔出，谂唔到会咁…」尤其狠批郑梓浩零吸引：「佢唔系我杯茶，我需要嘅高度、需要嘅男人气概，佢畀唔到。」肥妈觉得已故第二任老公Rick高大有型又有风度，强调冇男人信得过。
闻裸聊玩法狂闹核突
肥妈坚持真爱系唔应该讲金，即使追梦也不是要钱理由：「多馀啦，TVB有衫借，系佢嫌人哋啲衫啫。」肥妈又讲出重点来：「其实两公婆一齐食一齐住，边个赚多边个赚少啲唔紧要，但食佢住佢，仲朝三暮四，我养你；你养第二个梗系唔得啦，你估你真系识转弯呀！我就未试过、未见过罗！」提到郑梓浩试过跟「小四」DaDa祼聊；唔知咩系祼聊嘅肥妈听完解释即耍手拧头，猛话咁核突：「我古老唔得呀，顶唔顺呢啲玩法，哎呀，我惊第日见到佢会行开呀！」另外，郑梓浩为求得到Grace原谅，「食完唱」话自己身不由己，更指DaDa唔男唔女，似阿婆搞佢「唔起」，肥妈听到发火闹爆：「吓？咁仆街男人都有嘅，你都黐线㗎，搞佢唔起佢又上房？」肥妈表示听到都㷫，又指男人靠得住猪乸都会上树，更戥DaDa好惨，「人哋畀埋钱租屋仲话人哋丑样，DaDa个样好靓又高贵，咩阿婆呀？」不过，她明白女人锺意俾人𠱁，冇人用枪指住你，自愿嘅，自作孽不可活。对于讨论区洗版留言「中年好淫乱」，肥妈大平反说：「啋！《中年好声音》夹埋有几千个参加者得几个贱啫，树大有枯枝；族大有乞儿，一个族冇坏人点算系族群？」
讨厌亡夫老友急摄位
「登七」的肥妈直认有经济能力，有条件做Sugar Mommy包养「小鲜肉」，但佢冇谂过，「你都Short嘅，你肯我都唔制啦，其实我仲有好多人追只系我唔肯，有啲系亡夫朋友，佢一知道我老公走咗就问我『得唔得闲？』我话『No』，仲试过避佢避到入厕所半个钟，出返嚟佢都未肯走咪我走罗，我觉得好核突，完全唔啱数。」肥妈强调几十岁人唔需要性事，但以前就听班师奶教煲鹿尾巴、鹿筋、人参汤畀老公饮：「饮完获赞话『老婆帮到手喎』哈…坦白讲，我都有份享用过㗎。」𠵱家肥妈最重要有朋友及家人陪伴：「唔得闲理啲麻甩佬，中秋节跟儿孙夹期已经想死。」
理直气壮闹伍sir冷血
另外，肥妈和伍仲衡就「派灯」做法曾在评判席上针锋相对，肥妈自认有良心，唔介意变「长明灯」，反闹伍仲衡：「人要面树要皮，都畀人喺黑房走出嚟亮下相吖？得个剪影！人哋喺几千人入到100名，都唔畀人拎住一盏灯走咁阴功？咁冇良心？而且5位评判，拎住一盏灯唔会影响到赛果，做人有时要有啲大度，唔系做老师就大晒。」肥妈理直气壮表示在节目中闹伍仲衡冷血，「70岁人仲使乜掩饰？对事不对人，做出就要负责任唔怕俾人话，你估好似嗰只嘢(郑梓浩)咁不负责任呀。」刚通完「波仔」的肥妈手术前未惊过，「有乜好惊呀？个天好公平嘅，阎王要你三更死谁敢留你到五更？我个人咁好一定冇事？唯一衰格系一日食到黑，最爱食烧鸭、烧鹅皮，之后要食少啲。」
最新回应