李龙基首披露王青霞狱中近况：瘦咗10几磅 网民攻击得多学精咗街头被闹高EQ反击丨独家
2024-09-27 07:00 
今年6月，王青霞因被控逾期居留及使用虚假文书等7罪，被判入狱25个月，未婚妻安静坐监，李龙基就努力搵钱，狂接酒楼骚，又去柬埔寨登台。虽然事非暂时远离，但基哥坦言被无良YouTuber捏造新闻，搞到形象差晒，出街试过被人兜口兜面指住闹，「睇见你就冇胃口。」追月当天到狱中跟王青霞过节的基哥，首披露未婚妻近况，「佢好OK，瘦咗10几磅，Fit咗，精神咗。」仲话会乖乖静待「老婆」出嚟，好感人。采访：方骞平
虽然7月的《『基』不可失演唱会》因「不可抗力因素」延期，但李龙基有「食力」冇有怕，之前就现身一间老字号金行的晚宴，连唱《男子汉》、《星》、《Cotton Field》3首歌，High爆全场，基哥又唱到落台跟观众互动，𠱁得一班Auntie Fans鬼咁开心，涌住埋身影合照，猛收利是的基哥当然笑呵呵：「证明喺佢哋心目中，我地位有几高，其实啲YouTuber捏造新闻出嚟，佢哋会为我抱不平，知我哋好阴功，又冇得反驳！」
YouTuber荼毒网民
基哥收埋好多激气事件簿，不吐不快：「有次我哋6人团队去南沙拍MV，被偷影后向YouTuber乱作，话我黑口黑面推开fans唔影相，现场有咁多人可以做证，导演甚至建议我作出提控，只能讲公道自在人心，你话佢哋几无良呀？𠵱家我都唔睇网上评语，因为关公都有对头人，唔可能全部人都支持你，睇完会好伤心。」而最嬲一次发生喺两个月前，「我同朋友喺大埔快餐店食饭，有位年约50岁嘅男人大大声叫我『提款基』，然后冲前，仅相隔几个人身位嘅距离指骂我，『睇见你就唔想食，见到你就冇胃口，想呕喇，提款基…』」首次在街头被闹的基哥即对住他拍片：「我一举机，佢马上走人，但全间餐厅啲人都望住我，之后有个女人上前安慰我话『我好欣赏你嘅EQ，我好支持你㗎，啲人真系好无聊…』唉！其实『提款基』咪系YouTuber改嘅，我唔嬲，佢哋都系俾人荼毒啫。」
青霞狱中车保护衣
基哥每月可到狱中探王青霞两次，两人一直在倒数，期待明年7月7日鹊桥相会的日子：「叫做尘埃落定，佢都接受咗现实，又有个刑满日期，佢出嚟之后，我同佢返去佢佛山间屋暂住，然后尽快结婚申请佢来港定居。」谈到青霞近况，基哥称好ok：「佢喺狱中好忙，将长发束起日日开工车保护衣，好快又过一日，咁佢学嘢都快，师傅教咗佢一周就可以上车，唉！托赖啦，初时佢真系好唔惯，谂起佢喺狱中孤伶伶就唔开心，不过，佢都瘦咗成10多磅，叫做FIT咗啦，最重要精神好。」基哥强调一个人生活唔苦闷：「你估仲系20、30岁咩！我冇呢啲冲动，73岁(性生活)可有可冇，哈...𠵱家心如止水静待『老婆』出嚟，唔想有任何感情上牵挂，对『老婆』唔住。」基哥仲老实自爆「老婆」唔喺身边已停服壮阳保健品，大笑说：「呢大半年冇咁需要调节身体，暂时停一停先。」对于55岁郑梓浩中年好淫乱，基哥借题发挥为自己辩解：「每个人醒觉嘅时候唔同，好似我，睇相佬话我可以活到128岁，所以70岁醒觉唔算太迟啦。」
受注目都唔系好嘢
告别新闻人物身分，基哥庆幸有「何伯何太」嘅出现：「哈！大家嘅集中力唔使喺我身上，我送晒(焦点)畀佢，我都唔太想要，讲真，我唔系想利用老婆呢件事嚟出风头，因为唔系关注我音乐及艺术上。」记者笑他一世人未试过去到咁高位，基哥即笑出声，「哈…得啖笑啦，不过，13年前俾发酒癫嘅南亚裔男子袭击打肿只眼，负伤出席宴会时被30几名记者围访都吓咗一跳，但相比今次仲大件事，聘用咗两位事务律师及两名大律师处理，负担天文数字律师费，每次做风头趸都唔系好嘢。」
最新回应