杨天宇练到爆皮见血又晕全靠张继聪救命 地狱特训1个月爆肌拍《𥚃应外合》丨独家

29岁杨天宇（Angus）、周家怡和马思惠（Macy）@VIVA合演动作新片《𥚃应外合》，Angus和Macy首拍动作片，开拍前已练到周身伤，前者手掌起晒茧，仲要爆晒皮见血，越拍越瘦好彩有张继聪救佢一命，而后者更入埋医院做手术。而家怡就唔使打，仲可以狂摸Angus的超强胸肌。采访：杜杜 摄影：朱伟彦 发型:Cliff Chan@MYÖS(天宇)、Myos Jeremy（Macy） 化妆:Owen Ko @owenko.station(天宇) 、Davina Cheung@Cyrus Lee Makeup Team（Macy）服装:@evisu_hk(天宇)造型: @ithk@EMODA（Macy）

Angus、家怡和Macy认为拍打戏虽辛苦，但有好效果都值得。

Angus、家怡和Macy认为拍打戏虽辛苦，但有好效果都值得。

Angus拍完戏后迷上街头健身2年，直到年前不想手掌再受伤才停玩。

家怡转述导演袁剑伟说话，「佢话我好打得，只系冇拍出嚟。」

从不健身的Macy，拍完戏后认为对体力好有帮助而keep住做。

 继去年电影《电子灵》后，Angus再担正《𥚃应外合》男一，戏中要疯狂骚肌兼由头打到尾，但只得1个多月时间准备，唯有学运动员一样密集式操练，「星期一、三、五练电影动作，晏昼就练西洋拳同举铁，星期二、四、六就健身，夜晚再练西洋拳同举铁，一星期练足6日。」为了极速减磅，他更要着住类似太空衣的紧身衣，「系透唔到气嗰种衫，着住嚟做运动、打西洋拳，一除衫啲汗跌晒落地好夸张。」

Angus为电影苦练街头健身，狂操单杠高搞到伤晒。

Macy有跟Angus一齐锻鍊，亦有受伤。

手掌爆缸照练单杠

只是操练，Angus已练到爆晒缸，但一班魔鬼教练冇打算放过他，「我操到晕咁滞，个教练见我晕晕哋，就问我有冇食早餐，我话因为迟咗，只食咗只蛋，点知佢话唔紧要饮啖水再嚟过，仲有练街头健身，玩单杠搞到手掌爆晒，见晒肉流紧血，我谂住受伤终于可以唞唞，但教练照样叫我上杠，我问『爆咗都上杠？』，佢话『你爆咗无名指之嘛，突起只无名指揸杠咪得罗』，我系咁样模式去训练。」

Angus练单杠搞到手掌成块肉飞走，爆晒缸都照练。

Angus练单杠搞到手掌成块肉飞走，爆晒缸都照练。

由于冇经验，Angus冇时间做运动仲keep住节食，搞到拍落水戏时冻到震，「啱啱入秋啲水好冰，我顶唔顺系咁震，发型师帮我全身吹热风，有工作人员直情求我『𠵱家放宵夜你食少少嘢啦』，最终我系啪咗成个牛腩河仲加辣椒酱，个人即刻胀返，咁桥我之后就系拍第1场除衫打交戏。」

Angus认为拍打戏，受这种伤好少事。

Macy软组织撕裂入院

电影拍到尾声，Angus身形越拍越缩水，全靠张继聪「救一命」，「同佢拍最尾嗰场对打戏，佢同我讲『你个人凹晒』，我话我冇时间做gym，佢话『你一定要食返啲淀粉质』，我话教练叫我唔可以食淀粉质，唔系会冇咗个线条，但系佢有经验，当时教练又唔在现场，佢攞咗包朱古力果仁畀我食，好感动，又真系冇肥到，佢冇点我，哈哈！」家怡笑指：「唔怪之得佢成日揸住袋杏仁，好似松鼠仔咁。」

为这副靓身材，Angus下了不少苦功。

Angus跟张继聪于戏中对立，戏外非常感激前辈提点。

拍动作戏难免受伤，Angus亦唔例外，就算加晒护垫一样中招，「喺兽医诊所俾人任打嗰场最甘，讲我俾几个人搵书架掷，我垫晒护垫喺背脊，但偏偏掷正最尾冇垫嗰个位，好痛仲瘀晒，好彩冇事。」大学修读舞蹈系的Macy，柔软度有助演绎打戏，但一样受伤收场，「训练时要同武师背对背翻过去，喺佢身上做大字马，可能动作有少少唔啱，就大字马咁挞咗落嚟，整伤咗宽关节，即系大髀罅，痛到唔敢俾人扶起，要慢慢起返身，但我仲坚持继续训练。」拍完戏后她再练舞，又需要做大字马，做完痛足3日先识惊，「我去医院check，发现有个软组织撕裂咗，要做手术修补，𠵱家复元返。」

Macy有舞蹈根底，提腿等动作完全难不到她。

Angus误伤Macy下巴，「中咗一拳，把口有5分钟合唔埋。」

想拍超现实英雄片

戏中家怡跟Angus唯一对手戏，就是用心脏电击器为他急救，更要在男方强劲胸肌上狂搽啫喱，但访问当日，家怡竟然冇晒印象，「Angus啱啱话畀我听，我有份帮佢搽，我真系唔记得咗呀！咁紧要嘅事，点解我会唔记得㗎？！」搞到Angus投诉，「我真系有啲伤心罗！」讲到这场戏会令好多女观众羡慕，家怡答得搞笑：「证明我系好好嘅演员，当刻净系谂要救返佢，完全有谂过要搏懵，哈哈！」今次拍动作戏未够喉，3人都希望下次有机会再拍，家怡更想挑战超级英雄片，「嗰啲英雄片都系超现实，可以做啲现实做唔到嘅嘢都几正。」

就是救Angus这场戏，家怡有机会摸对方胸肌。