黎瑞恩离婚10年罕谈前夫 陈友忽略太太致患癌努力补偿做好老公丨独家
2024-10-30 07:00 
陈友太太Pauline于2013年突然患上罕有骨癌差啲冇命，令一直忽略太太的陈友反省，自此不断做见证会，发觉变成音乐剧唱出嚟可以分享畀更多人，《娱乐圈夫人》就此诞生，更搵嚟黎瑞恩饰演陈太一角。离婚10年的小恩子坦言为老公可以无限付出，就算捐器官都冇问题，更有感而发表示男人只要肯改变，女人一定会原谅。采访：杜杜 摄影：罗安强 发型:Taylor Wan@Leonardo 3 Hair Corner(黎瑞恩) 化妆:Seven Lai(黎瑞恩) 场地:The Fullerton Ocean Park Hotel Hong Kong
72岁陈友自责一直忽略73岁太太Pauline，爆当年温拿经理人要求不公开已婚，「话最好就唔好啦！会见到佢喎，不如佢今晚早啲返屋企瞓啦！嗰个年代系咁，畀人知都唔好提。」他还鬼马即唱剧中歌曲交代，「你要识吓捞，你存在成个行业难捞，哈哈！」小恩子亦好明白，「以前娱乐圈唔可以透露你有男朋友或者老婆，比较秘密，会有偶包，𠵱家唔同晒，大家会接受。」
小恩子似梅艳芳够义气
陈友之后搞移民做太空人，太太独力在加拿大凑儿子陈良韦 ，之后他再到内地发展，他坦认多年来太太有老公等如冇老公，「搵钱系男人最好嘅藉口，其实搵钱搵得其所，够就好啦，有时系想要唔系需要。」小恩子认为男人能全力发展事业，背后的贤内助功不可没，「男人要赚钱，女人帮唔到手喺后面打理晒啲嘢，其实都会好烦，乜嘢都要问咁点呀？有个妥贴嘅女人喺身边系好幸福。」
陈友越认识小恩子，越觉得她是绝世好老婆，「佢绝对系好好嘅女人，真系相夫教子，唔系有咁多女人做到㗎！」小恩子笑着多谢陈友，「多谢晒帮我卖广告！」陈友继续狂赞，「佢讲畀我听啲经历，点安排雪茄、翅、鲍鱼嗰啲妥妥善善，真系做得好好，佢系就算另一半眼角膜有事，自己都会捐出畀对方嗰种女人嚟。」小恩子觉得为老公，真系可以乜都肯，「如果我老公需要捐乜嘢，个肾、肝，我都一定会捐，做老婆应该系咁！」陈友认为小恩子够义气，不单对老公好，对朋友一样正，令他想起离世好友梅艳芳，「佢有阿梅嗰种feel，为朋友多过为自己，大姐咁出嚟照顾晒身边嘅人。」
太太患骨癌企都企唔到
2013年Pauline患上罕有骨癌，企都企唔到，陈友才识得后悔，「嗰时佢真系好痛，佢啲骨碎晒要搵机吊起先郁到，个脊椎都差啲座咗落嚟，啲神经压住晒，医生话畀我听，佢可能得返几个月命。」当时陈友用尽方法救爱妻不果，并非教徒的他唯有试埋祈祷，更承诺若太太好返会将经历分享畀更多人，结果翌日医生指有方法可医到太太，太太之后亦奇迹好返，于是他不停周围做见证会分享，更促成这个音乐剧诞生，「成日喺教堂讲见证，不如改成音乐剧唱出嚟，所以一定要搵小恩子帮手，系佢先唱得到咁好。」
小恩子出道时，陈友已在内地发展，处于不同界别所以并不认识，但小恩子收到前辈邀请好荣幸，再看音乐剧故事大纲已很喜欢，「我觉得唔单止讲娱乐圈，所有已婚女士，睇咗都会好有感触。」故事跟她某些经历很相似，「有好多部份都似我，例如先生成日唔喺香港去咗做嘢，同先生又好耐都冇见，好多嘢要自己一个去管理，小朋友或者生活上嘅嘢，同埋我都有唔舒服，但冇咁大镬啦！」
陈友感恩太太完全康复
陈友感恩Pauline已康复，还爱上跳拉丁舞，而他为了补偿太太，近10年都陪在身边做好老公，「依家成日煮饭罗！哈哈！其实系补唔返，过去就过去咗，都系尽量做㗎啫，点解要演呢个剧？原来思想上转变，可以改变一生，希望呢个剧畀到启发大家。」小恩子认为男人肯改变，作为太太一定会原谅，「如果个男人咁样对返我好，之前嗰啲都唔记得㗎嘞！」她又爆陈友夫妻相处劲sweet，「上次同佢哋食饭，我话畀佢太太听我演佢，佢好开心，佢望住陈友哥哥系好崇拜嘅眼神，好倾慕咁㗎！」
最新回应