Candy@COLLAR胆生毛开夜唔怕撞鬼 姜皓文杨伟伦拍《邪Mall》玩真招魂吓亲丨独家
2024-11-01 07:00 
姜皓文（黑哥）、王家晴（Candy）@COLLAR及杨伟伦（阿卵）在僵尸片《邪Mall》首合作，为配合电影要全夜班拍摄，阿卵仲要坚做招魂仪式，当得知工具、经文及烧嘅符全属真嘢都吓一吓，黑哥亦讲到好肉紧，「师傅拍完问我哋有冇头晕？」全场最细的21岁Candy反而最大胆，仲识玩自我安慰，「僵尸同鬼唔同。」勾起两位前辈停不了的赞赏，先赞勤力后赞拍戏有谂法，新人嚟讲非常不得了，搞到Candy完全唔识畀反应，好好笑。采访：杜杜 摄影：林宾尼 造型:Daniel Cheung&Alyssa Lai(Candy) 发型:Jove Shek(黑哥)、 Ricky Lam、Heitai(Candy)、 Louis Tse@Number8 Hair Salon(阿卵) 化妆:Manman Fong(黑哥)、Janice Wong(Candy)、Yannis Yip(阿卵) 服装:LaneCrawford(黑哥)、Sandro(Candy)场地:K11 Art House
黑哥在1998年的亚视剧《我和僵尸有个约会》已接触僵尸题材，26年后再拍《邪Mall》，虽然冇机会扮僵尸，但就要化特技妆，「去到最尾2日先要特技化妆，算系好舒服，我戥每日要做特技妆嘅演员辛苦，要向佢哋致敬，净系造型都5、6个钟。」全片在商场取景，拍摄要通宵进行，黑哥大呼辛苦，「个几月全夜班，真系几伤。」阿卵补充：「商场仲运作紧，冇得下午喺度跑嚟跑去又化晒嗰啲妆，哈哈！一定系商场close咗凌晨拍。」
阿卵拍完招魂头晕晕
拍灵异题材仲要开夜班，大胆Candy唔惊仲要好兴奋，「我好锺意睇呢类题材，有灾难性嘅事发生要逃跑嗰啲。」她亦唔担心会撞鬼，「僵尸同鬼系两样嘢，我拍嗰阵系咁谂。」黑哥亦赞同，「僵尸摸到，鬼摸唔到。」黑哥指有师傅在场做顾问较为安心，「师傅有解释咩系三魂七魄，几点个时辰要拍嗰场戏，拍完之后又问我哋，有冇头晕？搞到气氛好凝重。」
戏中演半桶水风水师的阿卵，本来唔惊鬼，但要坚做法事就另当别论，「有场戏讲驱邪，有招魂铃，师傅叫我背啲经文，教我点烧啲符，师傅话个当当、经文都系坚。」阿卵好奇问师傅「咁𠵱家我做嗰啲仪式呢？」答案原来都系坚，「所有嘢都系坚，我咪真系招紧嘢罗，佢话你唔使惊，有咩唔舒服就同我讲。」黑哥肉紧表示：「唔使惊，即系会有事啦！师傅又补咗句，啲嘢经过见到仪式就会嚟，见到流咪走罗，即系始终都会嚟喎！」阿卵话做完仪式确实有点头晕，「我应该因为未食嘢啫！」黑哥笑言：「大家唯有谂呢样嘢，头晕晕唔够瞓啫！」
Candy黑哥一嚟就闹交
继处女剧《极度俏郎君》见过一面后，首部电影再遇黑哥，兼饰演父女，Candy觉得好有缘。黑哥就大赞「乖女」表现，「Candy好勤力，我哋全夜班都几攰，但佢都几生猛，周围去探索吓去了解，呢个不得了。」戏中两父女有不少冲突戏，Candy最初好紧张，「我同黑哥第1场戏就系闹交，一嚟就拍闹交好紧张，但黑哥好好人，拍之前会同我倾吓偈，好快就冇咗嗰种紧张或者怯。」
Candy跟首合作的阿卵没有距离感，「第1次对戏，讲佢帮紧人睇相，嗰场戏比较搞笑，我观察佢同导演点样沟通，会加啲自己创作入去，令角色或者场戏更加好，令我觉得好安心，第1次合作唔会有压力，可以心无杂念咁去拍戏。」阿卵对Candy亦高度评价，「佢好认真对待呢个工作，冇停过谂点样可以做好场戏，feel到佢有啲谂法想自己去摸索，去到真系唔知点做先会问，佢会想试吓先，呢样嘢系好，如果一嚟就问人点做，对一个演员嚟讲冇咁好。」黑哥亦加把口，「通常新人一张白纸，叫佢做乜就做乜，佢唔系，会问清楚点解要做，咁做系咪会好啲，有自己谂法，梗系好事啦！」面对前辈们狂赞，Candy完全唔识畀反应：「受宠若惊！」再尴尬说：「多谢！我会继续努力！」非常可爱。
3人合作好开心，希望再拍《邪Mall》续集或其他题材，Candy就提议，「拍运动题材，拍长跑，我知黑哥有跑步。」阿卵抢住话唔做运动员，Candy就安排阿卵做教练，黑哥即投诉：「点睇我都系教练！」阿卵反驳他，「你系做当打嘅运动员。」Candy就觉得自己可以做经理人，阿卵及黑哥就相当不满，指她提议运动题材，自己唔做运动，「叫啲老人家去跑！」Candy唯有傻笑打圆场。
最新回应