黄子华自揭人生最大遗憾事：辜负黄沾 罕谈64岁不婚单身之谜 丨独家
2024-11-07 07:00 
相隔32年，集结香港两大笑匠黄子华、许冠文在新片《破．地狱》中再次合作，齐齐演绎一个关于生死的严肃故事，传达人生就是一场相遇和离别，反而要用有限的时间去珍惜身边人及当下的讯息，子华神坦言拍完后也受到感染，还向《头条日报》自揭两件收埋在「夹万」的心事。另外，向来少谈私事的黄子华用神级妙语解释64岁不婚之谜！采访：方骞平、摄影：罗安强 化妆：翁嘉齐(黄子华)、MW(卫诗雅)、SINCERE FUNG@Wi11Wong(朱栢康)、发型：@Helen@mobius_hk(黄子华)、Daniel Chou(卫诗雅)、HinWan @ M.i Salon(朱栢康)、造型：Sandro(卫诗雅)
11月9日上映的《破·地狱》聚焦香港独有的殡葬文化，除咗深入殡仪馆、东华三院义庄取景之外，黄子华更于深夜勇闯殓房通道拍摄，会有先人化妆及执骨等镜头。
约老死不相往来朋友食饭
黄子华、卫诗雅及朱栢康拍罢后，以自身角色探究生死，各自都有所反思，子华坦言：「释怀及珍惜好重要，某程度上要明白对方处境，有啲嘢佢都未必想咁做，所以套戏真系好劲，就系因为呢套戏嘅人物及剧情，对我有启发，甚至破咗我嘅『地狱』。」原来最近他相约一位心目中认定，这世都不会一齐食饭的身边人食了餐饭：「对方系有份量嘅人，曾对佢好不满，但连佢自己都唔知。」至于卫诗雅以前对灵车、灵堂、纸紥公仔都会有所忌讳，拍完此片后，她认为只要了解到它们背后的意思就不会有所惧；朱栢康反而会思考做人大道理，究竟是要迎合别人定做回自己？
不懂把握机会向沾叔学习
提到人生遗憾，黄子华形容如同呼吸空气一样是必有的元素，自爆人生最大遗憾发生在20几年前：「当年未红，沾叔(黄沾)经已搵我写剧本，佢请我去富豪饭堂食饭，饭后带我去佢屋企详谈，唉！当时我荷尔蒙失调，唔知黐咗边条筋由个脑直插落膀胱，竟然推咗话『我唔识得写人哋嘅剧本』，好后悔唔懂得把握机会向天才前辈，一代宗师偷师，所以𠵱家有机会跟许冠文合作，我就好似比特犬咁咬住唔放。」子华指许冠文系佢最大嘅偶像，心目中和李小龙齐名：「同佢合作唔系叫火花，系接到啲甘霖。」怎知打后他自编自导自演嘅电影《一蚊鸡保镖》破香港票房新低；而《乜代宗师》就将一生人的电影收入一铺清袋，笑言输了间劏房要「7街瞓」：「但唔好睇少我，我仲有个劏厕所…自己唔创作唔重要，最紧要同许冠文合作，大家拭目以待，如果票房有30亿嘅话，每个演员生够3.5个嚟谢票！」
冇儿冇女对结婚未有睇法
另外，问到单身的黄子华可有联想到将来丧礼？子华笑住大赞记者问得好：「又几好喎！提醒我有呢一日，嗰日一定会嚟...」他表示曾去过印度恒河睇烧尸及天葬的地方：「我唔介意用席卷起我，然后搵个唔犯法嘅地方『质』埋我，我觉得破地狱属于世界上3大仪式之一，所以好荣幸拍到呢个戏...」语毕，他搞笑道：「系呢，点解我成日都可以为部戏做宣传嘅！」对于角色讲他50几岁人，对结婚生仔有犹疑，追问究竟是否黄子华的心声？对此，子华笑住推说：「系导演心声，我冇儿冇女冇睇法。」他还用「子华神功」耍太极拆解不婚单身之谜：「我哋睇下喺地球边派，有生仔派、唔生派，我又唔系姓何，冇呢啲咁嘅身家，点可以有呢啲嘢(生仔)？如果未来有多啲工作及机会就可以谂下罗，冇就唔敢谂，但太忙又唔得喎...所以话呢套戏几丰富呀，咩话题都倾到喎，故冇得选择推戏。」对于冇后人的他，如何处理将来的遗产呢？他大笑说：「可能导演话我冇遗产呢。」
最新回应