被冷血司機撞飛少年恐癱瘓

（星島日報報道）「我好憎呢個司機撞到我個仔！仲要走咗唔理，好冇責任心。我個仔太細，得十四、十五歲，如果冇途人救佢，點算？」本周一晚在青山公路遭私家車撞飛重創的十四歲男童利濰，至今仍情況危殆。父母日夜守候愛兒消息，即使渡過危險期，但面對漫長康復之路，不禁無語問蒼天。

母：我好憎恨個司機

利濰就讀元朗公立中學，校方立刻啟動危機應變小組，校長及同學也關心他的狀況。校長更錄下一段錄音，讓利濰父母放在他耳邊鼓勵。「利濰，我係校長呀，聽唔聽到？校長好掛住你，你今次要叻仔啲呀！頂住呀！校長希望你快啲好返，返番學，同你見返面，你記得嗎？校長希望你成為元中畢業生，將來成為一個歷史學家，所以你一定要好返，頂住呀！」

利濰媽媽指兒子最初須在腹部內以紗布棉花止血，右手骨折，昨日做手術取出紗布及固定手部骨折的地方。醫生表示若他不及時轉送屯門醫院，「唔一定救得返」。「佢最嚴重盤骨同頭部，醫生話佢顱壓太高或血壓太高，好易導致腦幹死亡。」

「兒子中一至中三都有攞獎，好鍾意歷史科。佢本來今日可以上台攞獎，因為佢歷史科考到全級第一，但依家入咗醫院，冇呢個機會啦！」利濰媽媽哽咽說道。

歷史科考全級第一

媽媽難過續道：「即使過咗危險期都要諗點樣康復，呢個係最關鍵、最壓力大嘅問題，佢爸爸已經大年紀，阿仔康復條路好漫長。骨科醫生講阿仔成個散晒，有可能下半身癱瘓，手部神經受損可能會冇力，將來搵食都係一個問題，唔知點生存？」

利濰是家中獨子，早已退休的利濰爸爸與前妻育有一子，利濰媽媽是家庭主婦，本打算工作幫補生計，但現在利濰突然出事，「我依家全部計畫亂晒！唔知點安排生活！阿仔康復路要洗幾多錢，點樣幫到佢呢？」面對將來困境，不禁悲從中來。