軒公講有味Joke 撐「細佬」洪嘉豪

（星島日報報道）洪嘉豪（Kaho）一連兩場演唱會前晚圓滿結束，張敬軒現身尾場擔任嘉賓，震撼全場。Kaho當晚用軒公五月舉行個唱時送給他的咪高峰演唱，被軒公笑謂「好開心我支嘢晚晚陪住你！」Kaho更許諾下次上紅館開個唱時會再邀請對方！
前晚Kaho獲好友MC張天賦、Anson Kong、肥仔（梁業）、魏浚笙、白只、蘇麗珊及陳凱詠等捧場支持。當《騷靈情歌》音樂響起，張敬軒未出場，觀眾已興奮狂叫！Kaho與軒公合唱完《騷靈情歌》即相擁，Kaho坦言其實一見對方的身影出現台上就已想喊，但不想唱得不好而失禮，惟有死忍：「我第一個騷好想同好重要的人分享第一次，軒哥，我識你20年，我點會估到有呢一日，可以請你做嘉賓，仲要拿着你支咪喎。」軒公搞笑回答：「好開心我支嘢，可以晚晚陪住你，
哈哈！」
晒腹肌冧粉絲
張敬軒更公開大讚Kaho這個「細佬」憑個人努力在樂壇由低做起：「Kaho對我來講，真係親生細佬咁，我識佢個陣佢毛都未有……哈哈，唔係，係中學都未讀，仲讀緊小學。每次講開Kaho，喺佢媽咪眼中口中，呢個仔都係洪家驕傲，鋼琴又叻，有天分；喺Kaho的音樂事業上，我冇幫佢太多，今日佢企到台上，係全靠自己的努力同大家支持。」Kaho聞言即說：「我想同你講，上次你送支咪俾我，希望我可以喺自己個台唱歌，我做到啦，多謝你。軒哥，下次我上紅館，再請你！」獲全場狂熱歡呼！及至安歌部分，歌迷不停叫Kaho除衫，Kaho最終應大家要求，拉高件衫少少，360度轉圈讓歌迷感受他少少的
腹肌。